لندن(آن لائن)کرکٹ کے موجد برطانیہ نے اس کھیل کو جدید اور سنسنی خیز بنانے کیلئے ایک نیا فارمیٹ متعارف کرا دیا ہے جسے ’دی 100‘ کا نام دیا گیا ہے۔ 2020 ء میں شروع ہونیوالے اس ٹورنامنٹ میں برطانیہ کی ڈومیسٹک کی 8ٹیمیں شریک ہوں گی،
ان ٹیموں میں ٹرینٹ راکٹس، ساوتھرن بریو، ناتھرن سپر چارجرز، ویلش فائر، اوول انوینسیبلز، منچسٹر اورجنلز، لندن اسپریٹس اور برمنگھم فینکس شامل ہیں۔تمام ٹیموں کے کھلاڑیوں کی سیلیکشن کیلئے ڈرافٹنگ کا مرحلہ گزشتہ دن مکمل ہو چکا ہے، جس میں پاکستان کے تین کھلاڑیوں کا انتخاب کیا گیا ہے۔قومی ٹیم کے تیز گیند باز محمد عامر کو لندن سپریٹس نے ایک لاکھ یورو میں اپنی ٹیم میں انتخاب کیا ہے۔انکے علاوہ لیگ سپنر شاداب خان کو 75 ہزار یورو میں ساؤتھرن بریو جبکہ شاہین شاہ آفریدی 60 ہزار یورو میں برمنگھم فینکس نے خریدا ہے۔خیال رہے ابتداء میں ڈرافٹ کیلئے 35 پاکستانی کھلاڑیوں کے نام سامنے آئے تھے، جن میں شاہد خان آفریدی، قومی ٹیم کے نو منتخب ٹی ٹونٹی کپتان بابر اعظم، وہاب ریاض، محمد حفیظ، عماد وسیم سمیت دیگر بڑے نام شامل تھے۔دی100 کے ڈرافٹ میں سب سے پہلے افغانستان کے کپتان راشد خان کا انتخاب کیا گیا، جبکہ یونیورسل باس کریس گیل کو کسی بھی ٹیم نے نہیں خریدا۔اس مختصر طرز کی کرکٹ میں چھ بالوں پر مشتمل روائتی اوور کو ختم کر کے سو گیندوں پر مشتمل دس اوورز کے میچز کا انعقاد کیا جائیگا،میچ کے قوانین پر نظر دوڑائیں تو میچ کا دورانیہ 2 گھنٹے اور 30 منٹ تک کا ہو گا،100 گیندوں پر مشتمل میچ میں جو زیادہ رنز سکور کریگا وہ جیت کا حقدار قرار پائیگا،ٹیم کے کپتان اس بات کا فیصلہ کریگا کہ کس با?لر نے پانچ گیندیں کرانی ہے یا دس گیندیں،ہر بالر کو زیادہ سے زیادہ 20 گیندیں کرانیکی اجازت ہو گی۔
