کوالا لمپور(نیوزڈیسک)یوں تو زلزلے کا سبب زمین کے نیچے وقوع پذیر ہونے والی اچانک تبدیلیوں کا نتیجہ ہوتا ہے لیکن ملائیشیا کے پہاڑوں پر آنے والے ہلاکت خیز زلزلے کی ملائیشین حکام نے ایک دلچسپ سبب بتاتے ہوئے کہا ہے کہ یہ زلزلہ غیر ملکی سیاحوں کی مقدس پہاڑ کے قریب عریاں تصاویر بنانے کی وجہ سے آیا ہے۔ملائیشین ریاست ساباہ کے نائب وزیراعلیٰ جوزف پیرین نے کا کہنا تھا کہ پہاڑوں پرآنے والا زلزلہ ان 5 غیر ملکی سیاحوں کی وجہ سے آیا جنہوں نے مقدس پہاڑ کے سامنے عریاں تصاویر بنا کر پہاڑ کی بے حرمتی کی اس لیے اس کے ازالے کے لیے خصوصی عبادت کا اہتمام کیا گیا ہے جب کہ یہ پانچوں کوہ پیما اب بھی ملائیشیا میں ہیں اور انہیں ملک چھوڑنے کی اجازت نہیں دی گئی ہے۔حکام کے مطابق جن 5 کوہ پیماﺅں نے قانون کی خلاف ورزی کرتے ہوئے اس پہاڑ پر30 مئی کوعریاں تصاویر بنوائیں ان میں 2 کینیڈین، 2 ولندیزی اور ایک جرمن شامل ہے۔واضح رہے کہ کچھ روز قبل ملائشیا کے پہاڑ ماونٹ کنا بالو پر آنے والے 5.9 زلزلے سے 16 کوہ پیما ہلاک اور 2 لاپتا ہوگئے تھے جن کا تاحال کچھ پتا نہیں چل سکا ہے۔