اسلام آباد(نیوزڈ یسک ) تعلیم مکمل نہ کرنے کے بہت سے نقصانات کے متعلق آپ نے سنا ہوگا لیکن ایک حالیہ امریکی تحقیق میں یہ بھی معلوم ہوگیا ہے کہ تعلیم مکمل ہونے سے پہلے ہی جلد بازی کا مظاہرہ کرتے ہوئے شادی کرنے والے جوڑوں میں موٹاپے کا رجحان دیگر جوڑوں کی نسبت 65 فیصد زیادہ پایا جاتا ہے۔یونیورسٹی آف مشی گن کے انسٹیٹیوٹ فار سوشل ریسرچ کے سائنسدانوں کا کہنا ہے کہ جو لوگ یونیورسٹی کی تعلیم مکمل ہونے سے پہلے شادی کرلیتے ہیں انہیں نہ صرف ملازمت اور آمدنی کے لحاظ سے مشکلات کا سامنا کرنا پڑتا ہے بلکہ ان میں موٹاپے کی شرح بھی زیادہ ہے۔ اس تحقیق کے لئے 14ہزار نوعمر لوگوں کے متعلق 13سال قبل معلومات اکٹھی کرنی شروع کی گئیں اور اب تقریباً ڈیڑھ دہائی کے بعد حتمی نتائج مرتب کئے گئے ہیں۔ تحقیق میں شامل افراد کی تعلیم، عمر، شادی اور موٹاپے کے متعلق معلومات جمع کی گئیں۔ جن لوگوں نے کالج یا یونیورسٹی جانے کے بعد چار سال کی تعلیم مکمل کرنے سے پہلے شادی کرلی تھی ان میں دیگر افراد کی نسبت موٹاپے کی شرح 65 فیصد زیادہ پائی گئی۔ تحقیق کے سربراہ رچرڈ ایلن میش کا کہنا ہے کہ غالباً اس کی وجہ تعلیم مکمل نہ کرنے والوں کی سماجی صلاحیتوں اور مشکلات سے مقابلہ کرنے کی قابلیت میں کمی ہے۔

ان کا خیال ہے کہ جو لوگ تعلیم مکمل نہیں کرتے ان میں مسائل کو حل کرنے کی صلاحیت بھی قدرے کم ہوتی ہے اور وہ اپنی خوراک کو کنٹرول کرنے اور ورزش کی پابندی کرنے میں بھی نااہلی کا مظاہرہ کرتے ہیں جس کا نتیجہ موٹاپے کی صورت میں نکلتا ہے۔