اسلام آباد (نیوز ڈیسک )گمشدہ کتے کی تلاش کرنے والے کو چند ہزار روپے کی پیشکش ہوجانا تو کوئی غیر معمولی بات نہیں ہے لیکن ایک معمر چینی خاتون نے اپنے گمشدہ کتے کی تلاش کرنے والے کو 40 لاکھ یووان (تقریباً ساڑھے 6 کروڑ پاکستانی روپے ) کا گھر انعام میں دینے کا اعلان کردیا ہے۔چینی میڈیا کے مطابق 70 سالہ خاتون کی طرف سے جاری کئے گئے اشتہار کے سامنے آتے ہی کھلبلی مچ گئی اور بے کار نوجوانوں کی بڑی تعداد دارالحکومت میں واقع شاندار گھر کے خواب دیکھتی ہوئی کتے کی تلاش میں نکل کھڑی ہوئی۔ معمر خاتون کا کہنا ہے کہ اس کے بچے پہلے ہی بیرون ممالک میں بس چکے ہیں اور اس کا کتا اس کی زندگی کا واحد سہارا تھا۔ انہوں نے اشتہار میں لکھا ہے کہ کتا واپس لانے کو وہ اپنا گھر دے دیں گی کیونکہ وہ گھر کے بغیر تو رہ سکتی ہیں لیکن اپنے دکھ سکھ کے واحد سہارے کتے کے بغیر نہیں جی سکتی ہیں۔دوسری جانب معمر خاتون کے دکھ کا غلط فائدہ اٹھانے والے بھی بڑی تعداد میں سامنے آگئے ہیں۔ خاتون کا کہنا ہے کہ کئی لوگ ان کے پاس کتا لے کر آئے لیکن معلوم ہوا کہ وہ کسی آوارہ کتے کو پکڑ لائے تھے۔ کچھ جعلساز تو آوارہ کتوں کو اشتہار میں دکھائے گئے کتے جیسا میک اپ کرواکر بھی معمر خاتون کو دھوکا دینے کی کوشش کرچکے ہیں۔ کروڑوں کے کتے کی تلاش تاحال جاری ہے۔