ممبئی(این این آئی) ماضی کی مشہور بالی ووڈ اداکارہ روینہ ٹنڈن نے نوجوان مسلمان اداکارہ زائرہ وسیم کو بالی ووڈ چھوڑنے پر نا شکرا قرار دے دیا۔روینہ ٹنڈن نے ٹویٹر پر نیشنل ایوارڈ یافتہ فلم ’دنگل‘ کی اداکارہ زائرہ وسیم کے بالی ووڈ سے کنارہ کشی کے اعلان پر طنز کرتے ہوئے کہا کہ

اس سے کوئی فرق نہیں پڑتا کہ صرف دو فلمیں کرنے والی اس فلمی صنعت کی ناشکری اداکارہ ہے جسے اس نے سب کچھ دیا، صرف یہی کہہ سکتی ہوں کہ وہ باوقار طریقے سے جائیں اور اپنے فضول خیالات اپنے ہی پاس رکھیں۔روینہ ٹنڈن میں اپنی دوسری ٹویٹ میں زائرہ وسیم پر غصے کا اظہار کرتے ہوئے کہا کہ میں اپنی فلم انڈسٹری سے محبت کے ساتھ کھڑی ہوں، جس نے ہر ایک کو تمام تر مواقع فراہم کیے ہیں، اس سے باہر جانا آپ کا اپنا انتخاب ہے تاہم (فلم انڈسٹری میں رہنے پر) دیگر لوگوں کی تذلیل نہ کی جائے، اس فلمی صنعت میں سب شانہ بشانہ کھڑے ہیں جہاں مذہب، رنگ نسل اور علاقے کا کوئی امتیاز نہیں رکھا جاتا۔واضح رہے کہ نیشنل ایوارڈ یافتہ اداکارہ زائرہ وسیم نے گزشتہ روز اچانک بالی ووڈ سے قطع تعلق کرنے کی وجہ بتاتے ہوئے اعلان کیا تھا کہ 5 سال پہلے میں نے بالی ووڈ میں قدم رکھنے کا فیصلہ کیا جس نے میری زندگی کو ہمیشہ کے لیے بدل کر رکھ دیا۔زائرہ وسیم نے یہ بھی کہا تھا کہ تاہم اب بالی ووڈ میں کام کرنے کی وجہ سے ان کا ایمان خطرے میں پڑ رہا ہے اور اللہ ہمیں ہمارے ایمان کو مضبوطی سے قائم رکھنے والا بنائے اور ہمیں ان لوگوں جیسا بنائے جو اس کی یاد میں مصروف رہتے ہیں۔

موضوعات:روینہ ٹنڈن زائرہ وسیم