لاہور(این این آئی)پاکستان کرکٹ ٹیم کے سابق کپتان عبدالقادر نے کہا ہے کہ مکی آرتھر کو لانے والے وسیم اکرم اور رمیز راجا سے جواب طلب کرنا چاہیے۔پاکستان کرکٹ ٹیم کے سابق کپتان اور لیگ اسپنر عبدالقادر نے ایک انٹرویومیں کہاکہ قومی کرکٹ ٹیم کو تباہی کے راستے پر گامزن کرنے والے
کوچ مکی آرتھر کو اول تو ٹیم پاکستان کا کوچ ہونا ہی نہیں چاہیے تھا، وہ اس بات کے اہل ہی نہیں تھے کہ انہیں ٹیم پاکستان کی کوچنگ کی ذمہ داریوں کے لئے منتخب کیا جاتا۔سابق کپتان عبدالقادر نے سابق ٹیسٹ کپتان رمیز راجا اور وسیم اکرم سے بھی جواب طلب کرنے کا مطالبہ کیا ہے، جن کی مشاورت کیساتھ بورڈ نے مکی آرتھر کو کوچ بنایا۔عبدالقادر نے کہا کہ بڑے شرم کی بات ہے پاکستان میں لیجنڈ کرکٹرز گھر بیٹھے ہیں اور وسیم اکرم اور رمیز راجا جو خود پاکستان سے کھیلے، نام بنایا، بجائے اپنے ملک کے کرکٹرز کی آواز بنیں، غیر ملکی افراد کو اس منصب پر لانے کے لیے لابنگ کرتے ہیں اور انہیں بورڈ کیساتھ کام کرانے کی راہ ہموار کرواتے ہیں۔عبدالقادر کہتے ہیں کہ ایسا کیوں نہیں ہوتا کہ پاکستان ڈومیسٹک کرکٹ میں خدمات انجام دینے والے سابق کرکٹرز اور کوچز کو آگے لایا جائے، انہیں قومی ٹیم کیساتھ کام کرنے کا موقع دیا جائے، دنیا میں ایسا ہی کلچر ہے، البتہ ہمارا المیہ یہ ہے کہ ہمارے اپنے ہی اپنوں کے دشمن بنے ہوئے ہیں۔
