کراچی (این این آئی)محکمہ تعلیم کے ترجمان سعید میمن نے گرمیوں کی چھٹیاں بڑھائے جانے کے حوالے سے سوشل میڈیا پر آنے والی خبروں کی تردیدکردی۔ترجمان محکمہ تعلیم نے کہا ہے کہ تمام اسکولوں میں گرمیوں کی چھٹیاں یکم مئی سے 30 جون تک ہیں اور نئے تعلیمی سال کا آغاز یکم جولائی سے ہوگا، اس میں کسی قسم کی توسیع نہیں کی گئی۔انہوں نے کہا کہ محکمہ تعلیم کی طرف سے 2 جنوری 2019 کو منعقد کیے گئے اسٹیئرنگ کمیٹی کے اجلاس میں ہی پورے سال کے تعلیمی شیڈول کا فیصلہ کیا گیاتھا، جس کے مطابق

تمام اسکولوں میں گرمیوں کی چھٹیاں یکم مئی سے 30 جون تک ہوں گی اور نئے تعلیمی سال کا آغاز یکم جولائی سے ہوگا۔ترجمان محکمہ تعلیم کا کہنا ہے کہ اس حوالے سے کل سے سوشل میڈیا پر کچھ عناصر کی جانب سے پچھلے سال کے کسی چینل پر نشر ہوئی خبر کے اسکرین شاٹس جاری کرکے عوام کو پریشان کیا جا رہا ہے جن کو خاطر میں نہ لایا جائے۔انہوں نے کہا کہ گرمیوں کی چھٹیاں طے شدہ شیڈول (یکم مئی سے 30 جون تک) کے مطابق برقرار ہے اور اسکولوں میں یکم جولائی سے نئے تعلیمی سال کا آغاز ہوجائے گا۔