بیجنگ ،ملتان( آن لائن ) پنجاب کی سابقہ حکومت سے اسکالر شپ حاصل کرنے والے 150سے زائد طلبہ موجودہ حکومت کی طرف سے وظیفہ روکے جانے کی وجہ سے چین میں پھنس گئے ہیں۔ذرائع کا کہنا ہے کہ چین میں پھنس کر رہ جانیوالے والے طلبہ کا تعلق جنوبی پنجاب سے ہے ۔ جنوبی پنجاب سے اسکالر شپ پر جانیوالے والے طلبہ کا تعلق ملتان ، مظفر گڑھ ۔ڈیرہ
غازی خان اور لیہ سمیت دیگر اضلاع سے ہے۔ذرائع کے مطابق چین کے شہروں بیجنگ اور شنگھائی میں زیر تعلیم طلبہ بہت پریشان ہیں اور نوبت فاقوں تک آگئی ہے۔جنوبی پنجاب سے تعلق رکھنے والے طلبہ نے وزیراعلیٰ پنجاب اور وزیراعظم عمران خان سے وظیفہ جاری کرنے کی اپیل کی ہے۔ پنجاب کی سابقہ حکومت نے ان طلبہ کو لینگویج کورس کے لیے چین بھیجا تھا۔
