اسلام آباد (نیوز ڈیسک) پنجاب بھر کے سرکاری اور نجی تعلیمی ادارے 24 اگست سے پیر تا جمعہ معمول کے مطابق کھلیں گے۔ محکمہ اسکول ایجوکیشن نے سرکاری اسکولوں کے لیے نئے اوقات کار کا نوٹیفکیشن جاری کردیا ہے،

جن پر 15 اکتوبر تک عملدرآمد ہوگا۔نوٹیفکیشن کے مطابق سنگل شفٹ اسکولوں میں پیر سے جمعرات تک تدریسی سرگرمیاں صبح 8 بجے سے دوپہر ڈیڑھ بجے تک جاری رہیں گی، جبکہ جمعہ کے روز اسکول صبح 8 بجے سے 12 بج کر 45 منٹ تک کھلے رہیں گے۔ڈبل شفٹ اسکولوں میں مارننگ شفٹ پیر سے جمعرات صبح 8 بجے سے ساڑھے 12 بجے تک ہوگی۔ جمعہ کو اس شفٹ کے اوقات صبح 8 بجے سے دوپہر 12 بجے تک مقرر کیے گئے ہیں۔

اسی طرح ڈبل شفٹ اسکولوں کی ایوننگ شفٹ پیر سے جمعرات دوپہر ایک بجے شروع ہوکر شام ساڑھے 5 بجے تک جاری رہے گی، جبکہ جمعہ کے روز ایوننگ شفٹ کے لیے دوپہر 2 بجے سے شام ساڑھے 5 بجے تک کا وقت مقرر کیا گیا ہے۔محکمہ اسکول ایجوکیشن نے صوبے کے تمام چیف ایگزیکٹو افسران، ڈسٹرکٹ ایجوکیشن اتھارٹیز کو ہدایت کی ہے کہ نئے شیڈول پر ہر صورت عملدرآمد یقینی بنایا جائے۔نوٹیفکیشن میں یہ بھی واضح کیا گیا ہے کہ طالبات کے اسکولوں کے اوقات میں 15 منٹ کا فرق ضرورت کے مطابق ضلعی انتظامیہ کی سطح پر ایڈجسٹ کیا جاسکے گا۔