اسلام آباد (این این آئی) پیٹرولیم ڈویژن نے کرتھار پاکستان کیساتھ مکھڑ بلاک پر پٹرولیم کنسیشن معاہدہ اور ایکسپلوریشن لائسنس پر دستخط کردیئے۔کرتھار پاکستان کو فپیک کویت کی ماتحت کمپنی ہے۔دستخط کی تقریب کے موقع پر وفاقی وزیر پٹرولیم عمر ایوب خان بھی موجود تھے۔ معاہدے پر اسد حیاوالدین،سیکریٹری پیٹرولیم اور

شیخ نواف سعود الصبح، سی ای او کوفپیک نے دستخط کئے۔ وزیر پیٹرولیم نے پٹرولیم کنسیشن (پی سی) ڈائریکٹوریٹ کی تعریف کرتے ہوئے کہا کہ کچھ سالوں تک یہ محنت ضرور رنگ لائے گی اور ملک کو اضافی ہائیڈروکاربن مہیا ہوں گے.عمر ایوب خان نے واضح کیا کہ اس معاہدے کو عملی جامہ پہنانے سے غیر ملکی براہ راست سرمایہ کاری کو وقعت ملے گی،اس کے علاوہ یہ معاہدہ توانائی کی طلب و رسد میں موجود فرق کو بھی ختم کرے گا۔ انہوں نے کہاکہ مکھڑ بلاک پنجاب اور کے پی کے مختلف اضلاع پر محیط ہے،ان اضلاع میں اٹک، میانوالی چکوال اور کوہاٹ شامل ہیں،اس بلاک کا مکمل رقبہ1562.92 مربع کلومیٹر ہے،کوفپیک نے اس بات کا عہد کیا کہ وہ مکھڑ بلاک میں پہلے تین سال کے دوران 980 ورک یونٹ حاصل کرے گی.اس کام کے پروگرام کی ترتیب 600 کلومیٹر 2ڈی 3 ڈی سیزمک ڈیٹا کے حصول سے کیا جائیگا،دیگر یہ کہ کوفپیک اس علاقے میں 45 سو میٹر گہرا کنواں کھودنے کا ارادہ رکھتا ہے،اس بلاک میں کوفپیک کم از کم 9.8ملین ڈالر کی سرمایہ کاری کا ارادہ رکھتا ہے۔