اسلام آباد (مانیٹرنگ ڈیسک)وفاقی کابینہ میں پی ٹی آئی کے نظریاتی چہرے غائب ۔وزراء اور مشیروں کی اکثریت کا تحریک انصاف سے کوئی دیرینہ تعلق نہیں۔غیر منتخب افراد مشیر بن کر کابینہ کا حصہ بن گئے۔میڈیا رپورٹس کے مطابق وزیراعظم عمران خان کی 22 سالہ سیاسی جدوجہد میں ان کا ساتھ دینے والوں میں سے صرف شیریں مزاری، علی زیدی اور مراد سعید ہی کابینہ میں شامل نظر آتے ہیں۔

وزیر خارجہ شاہ محمود قریشی، وزیر داخلہ اعجاز شاہ،زبیدہ جلال،عمر ایوب،محبوب سلطان، پرویز خٹک، غلام سرور خان، شفقت محمود سمیت کئی افراد پی ٹی آئی کا یقینی اقتدار دیکھ کر کچھ عرصہ قبل پی ٹی آئی میں شامل ہوئے اورپی ٹی آئی کی ٹکٹ پر منتخب ہو کر وزیر بن گئے۔شاہ محمود قریشی، ڈاکٹر عبدالحفیظ شیخ، ڈاکٹر فہمیدہ مرزا اور ڈاکٹر فردوس عاشق اعوان پیپلز پارٹی کی کابینہ میں بھی وزیر رہے۔جب کہ زبیدہ جلال،غلام سرور خان،عمر ایوب،مخدوم خسرو بختیار،طارق بشیر چیمہ اور شیخ رشید مشرف دور میں کابینہ کا حصہ رہے۔تحریک انصاف کی اتحادی جماعت نے مشرف، پیپلز پارٹی اور ن لیگ کے دور میں اقتدار میں اپنا حصہ وصول کیا۔تاہم پاکستان تحریک انصاف کے وہ کارکنان جو کہ عمران خان کے لیے 22 سال سے جدو جہد کر رہے ہیں اور ہر موقع پر عمران خان کے ساتھ رہے وہی غائب ہیں۔واضح رہے ندیم افضل چن ،فردوس عاشق اعوان اور صمصام بخاری پیپلز پارٹی کے سابق رہنما ہیں۔تینوں رہنما تحریک انصاف کی حکومت میں اہم عہدوں پر فائز ہیں۔ندیم افضل چن وزیراعظم عمران خان کے ترجمان ہیں۔صمصام بخاری پنجاب کے وزیر اطلاعات ہیں جبکہ فردوس عاشق اعوان مشیر اطلاعات کا اہم عہدہ حاصل کرنے میں کامیاب ہوچکی ہیں ۔