واشنگٹن(این این آئی)امریکی صدر ٹرمپ نے کہاہے کہ شمالی کوریا کے سربراہ کِم جونگ اْن سے تیسری ملاقات اور شمالی کوریا کے خلاف پابندیوں میں انسانی بنیادوں پر کچھ ریلیف دینے پر غور کیا جا رہا ہے۔میڈیارپورٹس کے مطابق اوول آفس میں میڈیا سے بات کرتے ہوئے صدر ٹرمپ کا کہنا تھا کہ جنوبی کوریا کے صدر مون جے ان سے ملاقات میں شمالی کوریا کے سربراہ سے مزید ملاقاتوں کے بارے میں
بات کرینگے۔انہوں نے بتایا کہ ملاقات میں شمالی کوریا کے خلاف پابندیوں میں انسانی بنیادوں پر کچھ چھوٹ دینے کی بھی بات ہوگی، ان کا کہنا تھا کہ شمالی کوریا کے سربراہ کم جونگ کو بہت اچھی طرح جان چکا ہوں وہ بہت قابل احترام ہے اور یقین ہے کہ آئندہ آنے والے دنوں میں بہت زبردست کام ہونگے۔واضح رہے کہ اس سے پہلے شمالی کوریا کے سربراہ سے امریکی صدر ٹرمپ دو ملاقاتیں کر چکے ہیں۔
