اسلام آباد(مانیٹرنگ ڈیسک)پچھلے جمعے کرائسٹ چرچ کی مساجد پر ہونے والے حملوں میں 50نمازی شہید ہو گئے تھے ،نیوزی لینڈکی پولیس کا کہنا ہے کہ آسٹریلوی دہشت گرد کو اس وقت گرفتار کیا گیا جب وہ تیسرےہدف کی طرف بڑھ رہا تھا۔

پولیس کاکہناہےکہ واقعے کی اطلاع ملنے کے 21ویں منٹ میں ملزم کو گرفتار کر لیا گیا تھا، مسلح شخص کو 2 اہلکاروں نے گرفتار کیا۔پولیس کے مطابق اہلکاروں کو مسلح ہو کر حملے کی جگہ پہنچنے میں 10منٹ لگے تھے۔دوسری جانب کیوی حکام کا کہنا ہے کہ مسجد پر حملے کی ویڈیو کے براہ راست مناظر دوران ملازمت دیکھنے والے ایک ملازم کو نوکری سے بھی نکال دیا گیا ہے۔دریں اثنا وزیر اعظم نیوزی لینڈ نے پریس کانفرنس کرتے ہوئے بتایا کہ جمعے کو اذان ریڈیو اور ٹیلی ویژن سے براہِ راست نشر کی جائیگی۔اس کے علاوہ نیوزی لینڈ میں 2 منٹ کی خاموشی بھی اختیار کی جائے گی ہماری خواہش ہے کہ مسلم کمیونٹی کو سپورٹ کریں تاکہ وہ مسجدوں میں واپس آئیں خاص طور پر جمعے کو۔انہوںنے حملے کے بعد سب سے پہلے جائے وقوع پہنچنے والے اہل کاروں سے ملاقات کی اور ان کی حوصلہ افزائی کی۔اس موقع پر انہوں نے کہا کہ ملک میں ایسی فضا بنانا ہوگی جہاں تشدد پروان نہ چڑھ سکے۔جیسنڈا آرڈرن کرائسٹ چرچ میں کشمیری ہائی سکول بھی گئیں، شہداء میں سے کئی افراد کا تعلق اس سکول سے تھا۔