اسلام آباد (این این آئی)وزیر خارجہ مخدوم شاہ محمود قریشی نے کہاہے کہ بھارتی جارحیت کے خلاف، پاکستان کا جواب حق حفاظت خود اختیاری کے تحت اپنے دفاع میں تھا۔ پیر کو امریکہ کے قومی سلامتی کے مشیر ایمبیسڈر جان بولٹن نے وزیر خارجہ مخدوم شاہ محمود قریشی سے ٹیلیفونک رابطہ کیا جس میں پلوامہ واقعہ کے بعد خطے میں امن و امان کی صورتحال پر تبادلہ خیال کیا گیا ۔

مخدوم شاہ محمود قریشی نے کہاکہ ھندوستان کی طرف سے 26 فروری کو کی جانے والی در اندازی ناصرف پاکستان کی حدود کی خلاف ورزی تھی بلکہ اقوام متحدہ کے چارٹر کی بھی منافی تھی ۔مخدوم شاہ محمود قریشی نے کہاکہ اس جارحیت کے خلاف، پاکستان کا جواب حق حفاظت خود اختیاری کے تحت اپنے دفاع میں تھا ۔مخدوم شاہ محمود قریشی نے کہاکہ پاکستان خطے میں امن و امان کا خواہاں ہے اس لیے وزیر اعظم عمران خان نے جذبہ خیر سگالی کے تحت انڈین پائلٹ کو ہندوستان واپس بھجوایا ۔مخدوم شاہ محمود قریشی نے کہاکہ پاکستانی ہائی کمشنر سہیل محمود مشاورت مکمل کرنے کے بعد ہندوستان واپس پہنچ چکے ہیں ،ہم 14 مارچ کو کرتارپور راہداری معاہدہ پر گفت و شنید کیلئے ایک سرکاری وفد ہندوستان بھجوا رہے ہیں ۔ایمبیسڈر جان بولٹن نے کہاکہ میں اور سیکرٹری آف اسٹیٹ پومپیو شمالی کوریا کی قیادت کے ساتھ انتہائی اہم مذاکرات میں مصروفیت کے باوجود پاکستان اور بھارت کے مابین کشیدہ صورتحال کے سبب دونوں ممالک کی قیادت کے ساتھ رابطے میں رہے تاکہ کشیدگی میں اضافہ نہ ہو ۔ایمبیسڈر جان بولٹن نے خطے میں امن و امان کے حوالے سے پاکستان کی طرف سے کیے گئے اقدامات کو سراہا ۔وزیر خارجہ مخدوم شاہ محمود قریشی نے ہندوستان میں حالیہ الیکشن کے باعث ہندوستان کی طرف سے جارحانہ عزائم کے ممکنہ خدشات سے بھی آگاہ کیا جس سے ایمبیسڈر بولٹن نے اتفاق کیا ،ایمبیسڈر جان بولٹن نے افغان امن عمل میں پاکستان کے موثر کردار کی تعریف کی دونوں رہنماؤں نے اس سلسلے میں مشترکہ کاوشیں جاری رکھنے کے عزم کا اعادہ کیا۔