مظفر آباد (این این آئی)چکوٹھی،اْڑی کے کراسنگ پوائنٹ پر پل کی مرمت مکمل نہ ہونے کی وجہ سے اندرون کشمیر تجارت کو مزید دو ہفتوں کیلئے معطل کردیا گیا۔میڈیا رپورٹ کے مطابق لائن آف کنٹرول کے طور پر استعمال ہونے والے دریا پر چکوٹھی سیکٹر کے مقام پر یہ پل

کشمیر کے دونوں حصوں کو آپس میں ملانے کا کام کرتا ہے۔پل کے مقبوضہ کشمیر کی طرف 6 مارچ کو دراڑ کی نشاندہی کی گئی تھی تاہم اس کے باوجود کئی روز تک تجارت جاری رہی تھی۔ تین روز قبل آزاد جموں و کشمیر کی طرف 35 ٹرک 4 گھنٹوں تک انتظار کرتے رہے اور بھارت کے زیر کشمیر کے حکام نے انہیں آنے نہیں دیا کیونکہ انجینئرز کی جانب سے پل کا معائنہ کیا جارہا تھا اس کے بعد اگلے روز چکوٹھی کے تجارتی سہولت آفیسر کو ان کے ہم منصب کی جانب سے تجارت معطل کرنے کے حوالے سے اطلاع دی گئی۔انہوں نے لکھا کہ کمان پل کو عرصہ دراز سے لائن آف کنٹرول پار کرنے کے لیے استعمال کیا جاتا رہا ہے، تاہم اس پل کو اب فوری مرمت کی ضرورت ہے تاکہ مستقبل میں کسی قسم کے حادثے سے بچا جاسکے۔ان کے مطابق پل کا معائنہ سول اور فوجی انجینئر نے کیا جنہوں نے نشاندہی کی کہ پل کو فوری مرمت کی ضرورت ہے۔انہوںنے کہا کہ مرمت میں 10 سے 15 روز لگیں گے اور اس کے حساب سے تجارت معطل رہے گی۔تجارت کے منسوخ ہونے سے تاجروں میں تشویش کی لہر دوڑ گئی اور انہوں نے خدشہ ظاہر کیا کہ لائن آف کنٹرول پر موجود ان کے ٹرکوں میں پھل اور سبزیاں خراب ہوجائیں گے جن سے ان کو بھاری مالی نقصان ہوگا۔واضح رہے کہ کشمیر کے دونوں حصوں میں تجارت ہفتے کے 4 روز (منگل سے جمعہ) تک ہوتی ہے۔