اسلام آباد (نیوزڈیسک) گھر بسانے کے موقع پر دولہا اور دلہن کی خوشی سمجھ میں آتی ہے لیکن ایک سعودی جوڑے نے اپنا گھر اجاڑ کر خوب خوشی منائی اور خصوصی پارٹی کا بھی اہتمام کیا۔اخبار ”صدا“ کا کہنا ہے کہ جنوبی شہر الباحہ سے تعلق رکھنے والے جوڑے نے شادی کے محض دو ہفتے بعد علیحدگی کا فیصلہ کیا اور اس موقع پر ایک خصوصی رومانوی پارٹی کا اہتمام کیا گیا۔ الوداعی پارٹی کے انعقاد کے لئے خاص انتظامات اور تزئین و آرائش کا اہتمام کیا گیا تھا اور اس کے اختتام پر سابقہ دولہا اور دلہن نے ایک دوسرے کو پھولوں کا تحفہ بھی پیش کیا۔اخبار کا کہنا ہے کہ طلاق کے موقع پر خوشیاں منانے کی وجہ یہ سامنے آئی ہے کہ اس جوڑے کو والدین کے دباو¿ پر شادی کرنا پڑی تھی لیکن دوہفتے کے دوران یہ اس فیصلے پر پہنچ گئے کہ مجبوری کی شادی کو جاری رکھنا ممکن نہیں، لہٰذا دونوں نے بخوشی علیحدہ ہونے کا فیصلہ کیا اور اس موقع کو دونوں نے اپنی آزادی قرار دیتے ہوئے اظہار خوشی کے لئے پارٹی کا اہتمام کیا۔