کراچی (نیوزڈیسک)ایگیزیکٹ نے میڈیا ٹرائل کیے جانے پر سندھ ہائیکورٹ میں دو سو ملین کا ہتک عزت کا دعویٰ کر دیاہے۔تفصیلات کے مطابق عدالت نے ایگزیکٹ کی جانب سے درخواست کو سماعت کیلئے منظور کرتے ہوئے فریقین کو 25مئی کیلئے نوٹس جاری کر دیے ہیں۔ مقامی اخبار کے مطابق جسٹس محمد شفیع صدیقی پر مشتمل سنگل بینچ نے ہراساں کرنے اور میڈیا ٹرائل کئے جانے کے خلاف ایگزیکٹ پرائیویٹ لمیٹڈ کی جانب سے دائر 2 سو ملین کے ہتک عزت کے دعویٰ کی سماعت کی۔ درخواست گزار نے انور منصور خان ایڈووکیٹ کے توسط سے دائر دعویٰ میں ایف آئی اے اور چیئرمین پیمرا کو فریق بناتے ہوئے موقف اختیار کیا ہے کہ نیویارک ٹائم مین 17 مئی 2015ءکو ایگزیکٹ کے اسلام آباد اور کراچی کے دفاتر میں ایف آئی اے کی جانب سے چھاپے مارے گئے اور ملازمین کو گرفتار کرلیا گیا جبکہ ایگزیکٹ نے بول ٹی وی کا لائسنس لے رکھا ہے، چینل میں 2 لاکھ امیدواروں نے درخواستیں دیں تاہم چینل کے آن ایئر ہونے سے قبل ہی مقامی چینل نے بے بنیاد اور جھوٹی خبریں نشر کرنا شروع کردی ہیں، پیمرا ایگزیکٹ کے خلاف میڈیا ٹرائل روکنے میں مکمل طور پر ناکام ہوچکا ہے اور ایگزیکٹ کے ملازمین کو ایف آئی اے کی جانب سے مسلسل ہراساں کیا جارہا ہے، لہٰذا استدعا ہے کہ ایف آئی اے کو ہراساں کرنے اور میڈیا ٹرائل کو روکا جائے