اسلام آباد (این این آئی)آزاد کشمیر ،گلگت بلتستان سمیت پہاڑوں پر برف باری کا سلسلہ جمعہ کو بھی وقفے وقفے سے جاری رہا جس کے باعث موسم کی شدید مزید اضافہ ہوگیا ،سردی کی شدت سے آبشاروں کا پانی جم گیا ہے جس کی وجہ سے مقامی لوگوں کو پینے کے پانی کی قلت کا سامنا ہے، شاہراہ قراقرم پرچھتر پلین کے مقام پربرفباری سے ٹریفک کی روانی متاثرہوئی، گلیات میں تمام رابطہ سڑکیں بند ہو گئیں جس کے باعث لوگ گھروں میں محصور ہو کر رہ گئے۔
تفصیلات کے مطابق گلگت بلتستان اور اسکردو میں بھی وقفے وقفے سے جاری برف باری کے باعث سردی کی شدت میں اضافہ ہوگیا ہے،آزاد کشمیر کی وادی نیلم، وادی لیپہ، سدھن گلی، لس ڈنہ، باغ اور راولاکوٹ سمیت بالائی علاقوں میں شدید برف باری کے سلسلے نے لوگوں کی مشکلات بڑھادیں۔برف باری کے باعث شاہراہ نیلم شاردہ سے آگے اور وادی لیپہ کو جانے والی واحد شاہراہ ریشیاں کے مقام سے ہر قسم کی ٹریفک کیلئے بند ہوگئی۔ کوٹلی میں شدید برف باری کے باعث ضلعی انتظامیہ نے لوگوں کو غیر ضروری سفر نہ کرنے کی ہدایت کردی۔ملکہ کوہسار مری میں وقفے وقفے جاری شدید برف باری کے باعث مظفرآباد اسلام آباد روڈ ہر قسم کی ٹریفک کیلئے بند ہوگئی ادھرخیبر پختونخوا کے تفریحی مقامات ناران، شوگران،نتھیاگلی، ایوبیہ میں 4انچ سے ایک فٹ تک برف پڑچکی ہے جبکہ سوات،لوئر دیر،دیربالا اورکزئی میں برف باری کا سلسلہ وقفے وقفے سے جاری رہا۔وادی کاغان لمبی پٹی کے مقام پر 3 ہفتوں سے بند ہے، شاہراہ قراقرم پرچھتر پلین کے مقام پربرفباری سے ٹریفک کی روانی متاثرہے۔ گلیات میں بھی برفباری سے تمام رابطہ سڑکیں بند ہو گئیں۔علاوہ ازیں اسلام آباد، لاہور سمیت پنجاب، سندھ اور بلوچستان کے مختلف علاقوں میں دن بھر بارشوں کا سلسلہ وقفے وقفے سے جاری رہا۔ آزاد کشمیر ،گلگت بلتستان سمیت پہاڑوں پر برف باری کا سلسلہ جمعہ کو بھی وقفے وقفے سے جاری رہا جس کے باعث موسم کی شدید مزید اضافہ ہوگیا
