لاہور \ملتان ( آن لائن) ملک کے بیشتر علاقوں میں سردی کی شدت برقرار ہے، موٹروے اور قومی شاہراہ پر بھی دھند چھائی رہی، ملتان میں دھند کے باعث بس سمیت 5 گاڑیاں ٹکرا گئیں ،جس کے نتیجے میں ایک پولیس افسر جاں بحق اور 5 افراد زخمی ہو گئے۔ دوسری جانب محکمہ موسمیات نے کل بروز منگل سے ملک کے بیشتر علاقوں میں بارش کی پیش گوئی کر دی ہے۔

پنجاب، خیبرپختون خوا اور بلوچستان میں بادل برسیں گے ،ملک کے بالائی اور میدانی علاقوں میں ٹھنڈ کے ڈیرے، یخ بستہ ہواؤں نے خون جما دینے والی سردی کی کیفیت طاری کر دی، ہر جانب دھند ہی دھند، موٹروے اور قومی شاہراہ پر دھند کے باعث ٹریفک کی روانی متاثر رہی ، بعض مقامات پر حد نگاہ صفر اور بعض جگہوں پر 50 میٹر رہی، ملتان کے قریب جلہ کے علاقے میں شدید دھند کے باعث ایک بس اور 5 گاڑیاں ٹکرا گئیں، حادثے کے نتیجے میں موٹروے پولیس کا پٹرولنگ افسر جاں بحق اور 5 افراد زخمی ہو گئے جنہیں فوری طور پر ہسپتال منتقل کر دیا گیا۔ترجمان موٹر وے پولیس کے مطابق شہری گاڑیوں پر فوگ لائٹس استعمال کریں اور غیر ضروری سفر سے گریز کریں۔ دوسری جانب محکمہ موسمیات نے خوشخبری سنائی ہے کہ کل منگل سے پنجاب ، خیبرپختون خوا اور بلوچستان میں بادل برسیں گے۔گلگت بلتستان اور کشمیر کے بعض مقامات پر بھی بارش متوقع ہے، بارشوں کا سلسلہ بدھ تک جاری رہے گا، اتوار کو سب سے کم درجہ حرارت سکردو میں منفی 14 ریکارڈ کیا گیا، استور منفی10، گلگت منفی 07، کالام اور ہنزہ منفی 06، ،کوئٹہ منفی 03، قلات منفی 02 رہا جبکہ اسلام آباد، پشاور منفی ایک، لاہور 2، فیصل آباد 2، ملتان 4 اور کراچی میں 12 ریکارڈ کیا گیا۔