پاکستان کرکٹ بورڈ کے سابق چیف ایگزیکٹیو آفیسر عارف علی خان عباسی نے پاکستان اور زمبابوے کے درمیان محدود اوورز کی سیریز میں اپنے میچ آفیشلز نہ بھیجنے پر آئی سی سی پر سخت تنقید کی ہے۔ان کا کہنا ہے کہ ایسا کر کے آئی سی سی نے دنیا کو منفی پیغام دیا ہے۔واضح رہے کہ پاکستان میں چھ سال بعد انٹرنیشنل کرکٹ کی بحالی کے پہلے قدم کے طور پر زمبابوے کی کرکٹ ٹیم پاکستان آئی ہے۔تاہم آئی سی سی نے اس سیریز کے لیے اپنے امپائرز اور میچ ریفری کو سکیورٹی کے خدشات کے پیش نظر پاکستان بھیجنے سے انکار کر دیا ہے اور یہ میچ اب پاکستان اور زمبابوے کے امپائرز سپروائز کریں گے۔عارف علی خان عباسی کا کہنا ہے کہ پاکستان کرکٹ بورڈ اپنے طور پر زبردست کوشش کر کے زمبابوے کی ٹیم کو پاکستان بلانے میں کامیاب ہوا ہے اور اس نے اسے سکیورٹی کی ہر ممکن یقین دہانی کرائی ہے۔
