کراچی(این این آئی)گارڈ کی بہادری کا سوشل میڈیا پر خوب چرچا ہورہا ہے، گزشتہ روز چینی قونصل خانے پر حملے کے وقت شہریوں کو بچاتے ہوئے گارڈ کی ویڈیو وائرل ہوگئی۔بہادر گارڈ کی حاضر دماغی نے کئی جانیں بچائیں، دہشت گرد قونصل خانے میں داخل ہوئے تو دروازے پر الماری لگادی اور لوگوں کو چھپ جانے کی ہدایت کی۔ سیکیورٹی گارڈ نے فوری طور پر سیکیورٹی فورسز کو آگاہ کیا۔قونصلیٹ میں موجود شہری خاموشی سے ویڈیو بناتا رہا جو کہ اب سوشل میڈیا پر وائرل ہوگئی ہے۔

انٹرنیٹ صارفین گارڈ کو خراج تحسین پیش کررہے ہیں۔دریں اثناء چینی سفارت خانے پر حملے کے بعد معاملے کی تحقیقات جاری ہیں۔ دہشت گردوں کے روٹ کے لئے مختلف مقامات کی سی سی ٹی وی فوٹیج حاصل کی جارہی ہیں۔ چینی وفد بھی سفارت خانے کا جائزہ لینے پہنچ گیا۔چینی قونصلیٹ پر حملہ کے حوالے سے تحقیقاتی اداروں نے حملہ آوروں کی مزید تفصیلات جمع کرلیں۔ حملے کے ماسٹر مائنڈ ہربیار مری سمیت بارہ سہولت کاروں کی تفصیلات حاصل کی جارہی ہیں۔ سیکیورٹی اداروں کے مطابق دہشتگرد حملہ کے روز ہی کراچی پہنچے تھے۔ دہشتگرد سندھ بلوچستان کے سرحدی علاقے حب کے راستے سے کراچی میں داخل ہوئے تھے۔ دہشتگردوں نے چائینیز کونسلیٹ پہنچنے کے لیئے شیر شاہ سے مائی کولاچی والا راستہ استعمال کیا۔قانون نافذ کرنے والوں نے کراچی سے گرفتار سہولت کار کی نشاندہی پر مزید دو افراد کو حراست میں لیا۔ زیر حراست افراد گاڑیوں کو کرائے پر دینے اور خریدوفروخت کے کاروبار سے منسلک ہیں۔ ان میں سے ہی ایک شخص نے دہشت گردوں سے برآمد ہونے والی گاڑی کرائے پر دی تھی۔دوسری جانب چینی وفد نے قونصلیٹ کا دورہ کیا قونصل عملے و دیگر کو پولیس اور رینجرز نے حملے سے متعلق بریفنگ دی قونصل عملے نے سیکیورٹی اقدامات کا جائزہ بھی لیا۔ذرائع کے مطابق چینی قونصلیٹ پر حملے کا

ماسٹر مائنڈ کالعدم بلوچستان لبریشن آرمی (بی ایل اے)کا کمانڈر اسلم اچھو اس وقت بھارتی دارالحکومت دہلی کے میکس اسپتال میں زیر علاج ہے، جو مبینہ طور پر چینی قونصل خانے کا ماسٹر مائنڈ بتایا جاتا ہے۔ذرائع کا کہنا ہے کہ اسلم اچھو سیکیورٹی فورسز کے ساتھ اٹھارہ ماہ قبل سبی میں ہونے والے مقابلے میں زخمی ہوا تھا اور موقع سے فرار ہوگیا تھا جب کہ اس آپریشن میں بی ایل اے کے کئی کارندے مارے گئے تھے،

اسلم اچھو کی دہلی کے اسپتال میں زیر علاج ہونے کی تصویر بھی منظر عام پر آگئی ہے جو سوشل میڈیا پر وائرل ہوگئی ہے۔واضح رہے کہ گذشتہ روز کراچی کے علاقے کلفٹن میں واقع چینی قونصل خانے پر ہونے والا حملہ ناکام بنادیا گیا تھا، فائرنگ کے نتیجے میں دو پولیس اہلکار شہید جبکہ ایک سیکیورٹی گارڈ زخمی ہوا تھا جبکہ سیکیورٹی فورسز نے بروقت کارروائی کرتے ہوئے تین حملہ آوروں کو ہلاک کردیا تھا، جن کے قبضے سے خودکش جیکٹ اور اسلحہ بھی برآمد کیا گیا تھا۔