اسلام آباد (این این آئی) پاکستان نے عافیہ صدیقی کے حوالے سے تحفظات سے امریکہ کو آگاہ کردیا۔ترجمان دفترخارجہ کے مطابق پاکستان نے عافیہ صدیقی کے حوالے سے تحفظات سے امریکہ کو آگاہ کردیا ہے۔نجی ٹی وی نے سفارتی ذرائع کے حوالے سے بتایا ہے کہ پاکستان نے ایلس ویلز کے ساتھ عافیہ صدیقی کا معاملہ اٹھاتے ہوئے موقف اختیار کیا ہے کہ عافیہ صدیقی سے متعلق تمام تر بنیادی انسانی حقوق کو مدنظر رکھا جائے۔ترجمان دفترخارجہ نے کہا کہ
امریکی وفد کی جانب سے پاکستان کی درخواست پر غور کرنے کا وعدہ کیا گیا ہے ۔ترجمان کے مطابق پاکستان کے ہوسٹن میں قونصل جنرل ہر 15 روز بعد ڈاکٹر عافیہ سے ملتے ہیں اور وہ ڈاکٹر عافیہ کی خیریت دریافت کرکے ان تک فیملی کا پیغام پہنچاتے ہیں۔ذرائع کے مطابق دفترخارجہ نے وزیراعظم عمران خان کو عافیہ صدیقی کے خط سے متعلق آگاہ کیا ہے اس حوالے سے وزیرخارجہ شاہ محمود قریشی آئندہ ہفتے عافیہ صدیقی کی بہن ڈاکٹر فوزیہ صدیقی سے ملاقات کریں گے۔
