اسلام آباد (نیوز ڈیسک) پاکستان پیپلز پارٹی کی رہنما اور سابق وزیر خارجہ حنا ربانی کھر نے حکومت کے مظاہرین سے معاہدے پر شدید تنقید کی ہے، حنا ربانی کا کہنا ہے کہ حکومت نے شرائط مان کر پاکستان کو بڑا نقصان پہنچایا ہے، انہوں نے کہا کہ حکومت کے مظاہرین سے معاہدے کے بعد دنیا کو پیغام گیا ہے کہ ہم چند عسکریت پسندوں کے ہاتھوں یرغمال ہیں،

تحریک انصاف کو تنقید کا نشانہ بناتے ہوئے حنا ربانی کھر نے کہا کہ تحریک انصاف نے ہمیشہ موقع پرستی کی سیاست کی ہے، سابق وزیر خارجہ نے کہا کہ وزیراعظم عمران خان کی قانون پرعملداری کی تقریر محض تقریر ثابت ہوئی۔ واضح رہے کہ حکومت اور مظاہرین کے درمیان معاہدے طے پا جانے کے باعث دھرنے اور احتجاجی مظاہرے ختم ہو گئے اور ملک کی تمام اہم شاہرائیں بھی کھل چکی ہیں، اس معاہدے میں کہا گیا کہ آسیہ بی بی کا نام ای سی ایل میں ڈالنے کے لیے کارروائی کی جائے گی، اس کے علاوہ فیصلے پر نظرثانی کے لیے اپیل دائر کی جائے گی، اس معاہدے کی شقوں کے مطابق آسیہ مسیح کے مقدمے میں نظرثانی کی اپیل دائر کر دی گئی ہے جو کہ مدعا علیہان کا قانونی حق و اختیار ہے، جس پر حکومت معترض نہ ہو گی، آسیہ مسیح کا نام فوری طور پر ای سی ایل میں شامل کرنے کے لیے قانونی کارروائی کی جائے گی، آسیہ مسیح کی بریت کے خلاف تحریک میں اگر کوئی شہادتیں ہوئی ہیں ان کے بارے میں فوری قانونی چارہ جوئی کی جائے گی، آسیہ مسیح کی بریت کے خلاف 30 اکتوبر اور اس کے بعد جو گرفتاریاں ہوئیں ان افراد کو فوراً رہا کیا جائے گا، اس کے علاوہ اس واقعے کے دوران جس کسی کی بلاجواز دل آزاری یا تکلیف ہوئی ہو تو تحریک لبیک معذرت خواہ ہے۔ وفاقی حکومت کے ساتھ اس معاہدے پر وفاقی وزیر مذہبی امور صاحبزادہ نورالحق قادری، صوبائی وزیر قانون پنجاب راجہ بشارت، پیر محمد افضل قادری سرپرست اعلیٰ تحریک لبیک اور محمد وحید نور مرکزی ناظم اعلیٰ تحریک لبیک کے دستخط ہیں۔