لندن (آئی این پی ) وفاقی وزیراطلاعات فواد چوہدری نے کہا ہے کہ ہمیں شرپسندعناصر اورشدت پسندوں کے خلاف ٹھوس اقدامات کرنے ہوں گے، بحرانی صورت حال سے نمٹنے کے لیے جو اقدامات کیے، وہ محض آگ بجھانے کے لیے ہیں۔ ہفتہ کوان خیالات کا اظہار انھوں نے برطانوی نشریاتی ادارے کو انٹرویو دیتے ہوئے کیا۔ فواد چوہدری نے کہا کہ اب پرتشدد مظاہرے کرنے والوں کا مستقل حل نکالنا ہوگا ۔وفاقی وزیر اطلاعات نے کہا کہ بحرانی صورت حال سے نمٹنے کے لیے جو اقدامات کیے،
وہ محض آگ بجھانے کے لیے ہیں، البتہ ہمیں مستقل حل نکالنا ہوگا۔فواد چوہدری نے کہا کہ پی ٹی آئی کی حکومت اس قسم کے واقعات کا حل نکال کر رہے گی جبکہ آسیہ مسیح کے وکیل سیف الملوک کی بیرون ملک روانگی کے حوالے سے وفاقی وزیر اطلاعات فواد چوہدری نے حکومت کی جانب سے کیے گئے معاہدے کے بارے میں بات کرتے ہوئے کہا کہ اس کا قطعی طور پر یہ مطلب نہیں ہے کہ حکومت مظاہرین کے سامنے پسپا ہو گئی۔ انھوں نے مزید کہا کہ حکومت آسیہ بی بی کے تحفظ کے لیے ‘تمام ضروری اقدامات’ لے گی۔ہم اس ضمن میں واضح ہیں ۔یاد رہے کہ وزارت داخلہ نے مظاہروں اور دھرنوں کے دوران توڑ پھوڑ کرنے والے شرپسندوں کے خلاف کریک ڈان کی ہدایات جاری کر دی ہیں۔وزارت داخلہ نے کریک ڈاؤن کی ہدایت کرتے ہوئے موقف اختیار کیا ہے کہ مظاہرے کی آڑ میں شرپسندعناصرنے املاک کو نقصان پہنچایا ۔واضح رہے کہ گذشتہ دنوں سپریم کورٹ کے فیصلے کے بعد ملک بھر میں مظاہروں اور دھرنوں کا سلسلہ شروع ہوگیا تھا، جس سے معمولات زندگی مفلوج ہوگئے اور کئی شہروں میں کاروبار ٹھپ ہوگیا ۔بعد ازاں حکومت اور مظاہریں میں معاہدہ طے پانے کے بعد دھرنے ختم ہوگئے ۔
