اسلام آباد(آئی این پی ) تھانہ سیکرٹریٹ کے علاقے ڈپلومیٹک انکلیو میں واقع اپارٹمنٹس میں گن پوائنٹ پر خاتون کوزیادتی کا نشانہ بنا ڈالا ، ملزمان میں ایک پولیس اہلکار بھی شامل ہے ، پولیس نے اپنے پیٹی بھائی سمیت دو ملزمان کے خلاف مقدمہ درج کر کے ان کو گرفتار کر لیا ۔
تفصیلات کے مطابق ڈپلومیٹک انکلیو میں واقع اپارٹمنٹس میں ایک خاتون کی راجہ فیضان اور شہزاد نامی پولیس اہلکار نے گن پوائنٹ پرعزت لوٹی جس نے وہاں سے بھاگ کر ڈپلومیٹک انکلیو کے شمس پکٹ پر آکر ڈیوٹی پر مامور پولیس اہلکاروں کو واقع سے متعلق آگاہ کیا جو انہیں تھانہ سیکرٹریٹ لے گئے ،تھانہ سیکریٹریٹ میں مقدمہ درج کر لیا گیا۔ خاتون سے زیادتی کی کوشش کرنے والے پولیس اہلکار شہزاد اور راجہ فیضان کو گرفتار کر لیا گیا ۔ڈپلومئٹک کے جس اپارٹمنٹ میں زیادتی کرنے کی کوشش کی گئی وہ سندھ سے تعلق رکھنے والے رکن صوبائی اسمبلی کی ملکیت ہے۔ پولیس ذرائع کے مطابق فلیٹ کی چابیاں سمیع نامی شخص کے پاس تھیں جس نے ملزمان راجہ فیضان اور پولیس اہلکار شہزاد کی معاونت کی۔ اجتماعی زیادتی کے دوران خاتون بھاگ کر ڈپلومیٹک ایریا میں پولیس کی شمس پکٹ پر پہنچی اور مدد مانگی۔
