نیویارک(این این آئی)بچوں اور بڑوں سب ہی کی پسندیدہ ترین کارٹون جوری ٹام اینڈ جیری اب بہت جلد لائیو ایکشن میں نظر آئیں گے۔وارنر بروز کی تخلیق کردہ ٹام اینڈ جیری کارٹون کو لائیو ایکشن میں بنانے کی تیاریاں شروع کی جاچکی ہیں جس کی ہدایت کاری اور فلمسازی کے لیے
ٹم اسٹوری کو منتخب کرلیا گیا ہے۔اس بارے میں مداح کچھ تذبذب میں بھی ہیں کہ کارٹونز کو لائیو ایکشن میں کس طرح تبدیل کیا جائے گا؟اب تک سامنے آنی والی رپورٹس کے مطابق فلم کی ٹیم کا فیصلہ ہے کہ جس طرح کارٹونز میں ان دونوں کرداروں کو خاموش دکھایا جاتا تھا اور یہ مختلف جسمانی حرکتیں کرتے تھے، لائیو ایکشن میں بھی اس اسٹائل کو برقرار رکھا جائے گا۔فلم کو بہترین بنانے کے لیے جدید ٹیکنالوجی کا بھرپور استعمال کیا جائے گا اور شاندار ویڑول افیکٹس استعمال کیے جائیں گے لہٰذا یہ اندازہ لگانا مشکل نہیں کہ ٹام اینڈ جیری بڑی اسکرین پر آ کر تہلکہ مچا دیں گے۔فلم کب تک مکمل ہو کر پردہ اسکرین پر جلوہ گر ہوگی؟ اس بارے میں فلم کی ٹیم کا کہنا ہے کہ یہ مشکل کام ہے اور مشکل اور اچھا کام کچھ وقت لیتا ہے۔واضح رہے کہ چند روز پہلے ہی ایک اور کارٹون فلم الہٰ دین کے لائیو ایکشن ریمیک کا ٹیزر جاری کیا گیا ہے جس نے بچپن میں ان کارٹونز کو شوق سے دیکھنے والوں کے شوق کو بڑھا دیا ہے اور وہ بے صبری سے فلم کا انتظار کر رہے ہیں۔
