بیجنگ(نیوزڈیسک ) چین میں ایک ایسا انوکھا تفریحی پارک قائم کیا گیا ہے جہاں انسانوں کو موت کا مزہ چکھایا جاتا ہے۔ چین کے ورلڈ تھیم پارک میں ایک حصہ جسے ”سمادھی“ کا نام دیا گیاہے میں سیاحوں کو 4 ڈی ٹیکنالوجی کے ذریعہ زندہ انسانوں کو موت کے مراحل سے گزاراجاتا ہے، تھیم پارک میں پہلے سیاح کو مردہ خانے میں رکھا جاتا ہے اور پھر کچھ دیر بعد اسے ایک تابوت میں ڈال کر شمشان گھاٹ تک لے جایا جاتا ہے جہاں گرم ہوا کے ذریعے اسے جلنے کے عمل سے گزارا جاتا ہے۔اس دوران سیاحوں کو حقیقت میں آگ میں جلنے کا احساس دلانے کے لیے روشنیوں کو استعمال کیا جاتا ہے اس کے بعد آخری مرحلے میں مصنوعی طور پر مرنے والا دوبارہ پیدا ہونے کے مرحلے میں داخل ہوجاتا اورچھت پر اس کا ایک ایسا خاکہ نمودار ہوتا ہے جیسے کہ وہ اپنی ماں کے پیٹ میں ہو بعدازاں ایک کمرہ جس کے فرش اوردیواروں کو نرم گدوں سے ڈھانپا گیا ہے میں سیاح بچوں کی طرح گھٹنے کے بل چلتے ہیں۔جب سیا ح اس عمل سے گزرنے کے بعد باہر نکلتے ہیں تو وہ پسینے سے شرابور ہوتے ہیں لیکن اس امر کا پتہ نہیں لگایا جاسکا کہ وہ اندر موجود گرمی کی وجہ سے پسینے سے بھیگے ہوئے ہیں یا موت کے خوف کے باعث ان کے پسینے چھوٹ چکے ہیں۔