اسلام آباد (نیوز ڈیسک )کبھی کبھی ایسے واقعات ہوتے ہیں جو سننے والے کو خوشگوار حیرت میں ڈال دیتے ہیں ایسا ہی کچھ ہوا ایئر کینیڈ ا کی پرواز میں جہاں بحر الکاہل کے اوپر ہزاروں فٹ بلندی پر سفر کے دوران ایک خاتون نے بچے کو جنم دے دیا جس پر جہاز کے مسافر بے ساختہ تالیاں بجانے مجبور ہوگئے۔کینیڈین میڈیا کے مطابق ایئر کینیڈا کی 10 گھنٹے طویل پرواز کالگیری سے ٹوکیو کی جانب محو پرواز تھی کہ اچانک ایک حاملہ خاتون شدید تکلیف سے کراہ اٹھی جسے جہاز میں موجود ڈاکٹر بزنس کلاس میں لے گئے جہاں کچھ دیر بعد اس نے ایک بچی کو جنم دےدیا۔بچی کے والد کا کہنا تھا کہ اسے بالکل بھی امید نہیں تھی کہ جہاز میں ہی بچے کی ولادت ہوجائے گی کیوں کہ سفر سے قبل ڈاکٹر سے معائنہ کرنے کے بعد وہ سفر کے لیے تیار ہوئے تھے۔ میڈیا رپورٹ کے مطابق ولادت کے بعد جب فلائٹ انتظامیہ نے جہاز میں ایک نئے ننھے مسافر کی آمد کا اعلان کیا تو مسافرخوشی سے تالیاں بجانے لگیں۔ ایئر کینیڈا کے مطابق والدین نے بچی کا نام چلوئی رکھا ہے جب کہ ماں بیٹی دونوں کی حالت تسلی بخش اور صحت مند ہے۔