نئی دلی(آن لائن) کینسر کے مرض میں مبتلا بالی وڈ اداکارہ سونالی بیندرے کی موت سے متعلق افواہوں پر ان کے شوہر نے اپیل کی ہے کہ سوشل میڈیا صارفین ذمہ داری کا احساس کریں۔تفصیلات کے مطابق بالی وڈ اداکارہ سونالی بیندرے امریکا میں موجود ہیں جہاں کینسر کی تشخیص کے بعد سے وہ قیام پذیر ہیں۔گزشتہ روز اداکارہ نے اپنی بیماری سے متعلق سوشل میڈیا کے ذریعے مداحوں کو آگاہ کیا جس کے بعد بالی وڈ اسٹارز سمیت ان کے مداحوں نے دکھ کا اظہار کیا تھا۔چند روز قبل اداکارہ کے حوالے
سے سوشل میڈیا پر افواہیں گردش کرنے لگیں کہ وہ دنیا سے چل بسی ہیں جس پر بھارتی حکمران جماعت بھارتیہ جنتا پارٹی کے رکن اسمبلی رام قدم نے سونالی کے خاوند سے اظہار افسوس کیا تھا۔اتوار کے روز سماجی رابطے کی ویب سائٹ ٹوئٹر پر اپنے ایک پیغام میں نامور بالی وڈ اداکارہ سونالی بیندرے کے شوہر گولدی بیہل کا کہنا تھا کہ سوشل میڈیا صارفین کو ذمہ داری کا احساس کرنا چاہیے‘ہمیں افواہوں پر بھروسہ نہیں کرنا چاہیے اور نہ ہی انہیں پھیلانا چاہیے‘جو ایسا کرتے ہیں وہ جذبات مجروح کرتے ہیں۔