خشکی میں محصور کر غزستان وسطیٰ ایشیا میں چین کے مغرب اور قازقستان کے جنوب میں واقع ہے۔ اس کا رقبہ ایک لاکھ ننانوے ہزار نو سو اکیاون مربع کلو میڑ ہے جس کا تقریباً نوے فیصد علاقہ پہاڑوں پر مشتمل ہے۔ اس کا دارالحکومت بشکیک ہے جس کا سابق نام ( آزادی سے پہلے) فرونز تھا اس کی سرحدیں چین ‘ازبکستان‘قازقستان اور تاجکستان سے ملتی ہیں جن کی کل لمبائی تین ہزار اکیاون کلومیٹر ہے۔ اس کی آبادی چھپن لاکھ سے زائد نفوس پر مشتمل ہے جس میں 75 فیصد مسلمان ہیں اور شرح خواندگی ننانوے فیصد ہے۔
اس علاقہ میں اسلام کی آمدساتویں صدی عیسوی میں ہوئی۔ نویں صدی عیسوی میں یہاں سمانی خاندان نے حکومت کی۔ اس سرزمین پر نو سو بیالیس عیسوی میں پیدا ہونے والے رحمدل حکمران ابو منصور سبکتگین نے دسویں صدی عیسوی کے آخر میں غزنوی دور حکومت کی بنیاد رکھی جو مشرق وسطیٰ سے لے کر وادی سندھ‘ پنجاب ‘بلوچستان اور بحر ہند تک پھیلی ہوئی تھی۔ ابو منصور اپنی رعایا میں انصاف اور رحمدلی کی وجہ سے بہت مقبول تھا۔