کراچی (مانیٹرنگ ڈیسک) زہرہ شاہد قتل کیس کا فیصلہ آ گیا، انسداد دہشت گردی کی عدالت نے تحریک انصاف کی رہنما زہرہ شاہد قتل کیس میں ایم کیو ایم کے 2 کارکنوں کو موت کی سزا سنا دی ہے۔ ایک نجی ٹی وی چینل کی رپورٹ کے مطابق عدالت نے جرم ثابت ہونے پر ایم کیو ایم کے کارکن راشد ٹیلر اور زاہد عباس زیدی کو سزائے موت سنا دی۔ زہرہ شاہد قتل کیس میں رینجرز پراسیکیوٹر کی طرف سے موقف اپنایا گیا تھا کہ قتل میں ملوث ملزمان کا

تعلق ایم کیو ایم سے ہے، ملزمان نے تفتیش میں زہرہ شاہد کے قتل کا اعتراف کیا تھا جب کہ قتل میں ملوث ملزمان کو گواہوں نے بھی شناخت کرلیا تھا۔ اس کے علاوہ عدالت نے عدم ثبوت کی بناء پر ملزم عرفان اور کلیم کو بری کر دیا ہے، یاد رہے کہ تحریک انصاف کی رہنما زہرہ شاہد کو مئی 2013 میں ان کے گھر کے باہر قتل کیا گیا تھا جب کہ حکومت نے زہرہ شاہد کے قتل میں ملوث ملزمان کی نشاندہی کے لیے 25 لاکھ روپے کا انعام بھی رکھا تھا۔