نئی دہلی(آئی این پی )امریکی ڈالر کے مقابلے میں بھارتی روپے کی قدر میں ریکارڈ کمی ہوئی ، بھارت میں ایک امریکی ڈالر 70روپے میں فروخت ہوا،بھارتی روپے کی قدر میں گراوٹ کیوجہ عالمی منڈی میں خام تیل کی قیمت میں اضافہ ہے۔بھارتی میڈیا کے مطابق منگل کے روز امریکی ڈالر کے مقابلے میں بھارتی روپے کی قدر میں ریکارڈ کمی دیکھی گئی۔ بتایا گیا ہے کہ ترک مالیاتی بحران کے تناظر میں سرمایہ کاروں نے بھارتی روپے کو فروخت کیا،

جس کی وجہ سے ڈالر کے مقابلے میں بھارتی روپے کی قدر میں اچانک کمی واقع ہوئی۔ منگل کے دن ایک ڈالر کی قدر ستر بھارتی روپوں کے برابر پہنچ گئی۔ جنوبی افریقہ، ارجنٹائن، میکسیکو، برازیل اور روس کی کرنسیوں میں بھی گزشتہ ایک ہفتے سے کمی کا رجحان دیکھا گیا ہے۔ رواں برس کے آغاز پر ایک ڈالر 63.67 بھارتی روپوں کے برابر تھا۔ ماہرین کے مطابق بھارتی روپے کی قدر میں گراوٹ کی ایک وجہ عالمی منڈیوں میں خام تیل کی قیمتوں میں اضافہ بھی ہے۔