اسلام آباد(نیوز ڈیسک )اسپیکر قومی اسمبلی سردار ایاز صادق سے جمعہ کو پارلیمنٹ ہاﺅس میں قطر کے سفیر سقر بن مبارک نے ملاقات کی جس میں دوطرفہ تعلقات سمیت باہمی دلچسپی کے امور پر تبادلہ خیال کیا گیا۔
اس موقع پر اسپیکر قومی اسمبلی سردار ایاز صادق نے قطر کے سفیر سے بات چیت کرتے ہوئے کہا کہ پاکستان کے قطر کے ساتھ تاریخی تعلقات ہیں، ہم ان تعلقات کو دونوں ممالک کے درمیان پارلیمانی روابط کے ذریعے مزید وسعت دینے کے خواہاں ہیں۔ انہوں نے کہا کہ پارلیمانی سفارتکاری دونوں ممالک کے عوام کو ایک دوسرے کے قریب لانے کا بہترین ذریعہ ہے۔ انہوں نے قطر کی طرف سے پاکستان کی ہر ضرورت پر بے مثال سپورٹ کا بھی خیرمقدم کیا۔پاکستان اور قطر کے درمیان اقتصادی تعاون پر اطمینان کا اظہار کرتے ہوئے اسپیکر نے کہا کہ قطر کے سرمایہ کاروں کو پاکستان میں سرمایہ کاری کے مواقع کا فائدہ اٹھانا چاہیے اور انہیں توانائی اور پیداواری شعبے میں سرمایہ کاری کرنی چاہیے۔قطر کے سفیر سقر بن مبارک نے اسپیکر کا خیرسگالی کے جذبات کے اظہار پر شکریہ ادا کیا اور کہا کہ قطر پاکستان کے ساتھ تعلقات کو بڑی قدر کی نگاہ سے دیکھتا ہے، ہم پاکستان کو ترقی اور خوشحالی کی منزل سے ہمکنار ہوتا دیکھنے کے خواہشمند ہیں۔ قطر کی قیادت پاکستان کے ساتھ باہمی تعاون اور دوستی پر مبنی تعلقات کو مزید مستحکم بنانے کی خواہاں ہے۔ انہوں نے کہا کہ پاکستان میں توانائی کے بحران کے خاتمے کیلیے قطر ہر ممکن امداد فراہم کرے گا، جب بھی ضرورت ہوئی ہم ایک اچھے دوست اور بھائی کی طرح پاکستان کا بھرپور ساتھ دیں گے۔