کراچی (آئی این پی ) پاکستان پیپلزپارٹی کے رہنما منظور وسان نے عمران خان کی نئی بننے والی حکومت کے متعلق اہم پیشنگوئی کرتے ہوئے کہا ہے کہ یہ مشکل سے 2سے ڈھائی سال پورے کر پائے گی، آنے والی حکومت مختلف پارٹیوں سے بلیک میل ہوتی رہے گی بلاول بھٹو کو اپوزیشن لیڈر بنانے کے لیے پیپلز پارٹی اور ن لیگ میں مذاکرات ہوسکتے ہیں،جی ڈی اے اور ایم کیو ایم والوں کا حشر خراب دیکھ رہا ہوں۔منظور حسین وسان نے کہا ہے کہ عمران خان کی حکومت کو بڑی مشکلات کا سامنا کرنا پڑے گا، ان کی حکومت کے خلاف اس بار دھرنے اور اپوزیشن اسٹرانگ ہوں گے۔انہوں نے کہا کہ بلاول بھٹو کو اپوزیشن لیڈر بنانے کے لیے پیپلز پارٹی اور ن لیگ میں
مذاکرات ہوسکتے ہیں، جبکہ آنے والی حکومت مختلف پارٹیوں سے بلیک میل ہوتی رہے گی۔جی ڈی اے سے متعلق ان کا کہنا تھا کہ یہ غنڈہ گردی الائنس ہے، اس سے سندھ کے عوام نے بدلہ لیا ہے،جبکہ ایم کیو ایم کراچی سے ٹھپے لگا کر جیتتی تھی اس بار ٹھپے نہیں لگنے سے ہار گئی۔ ان کا مزید کہنا تھا کہ جی ڈی اے اور ایم کیو ایم والوں کا حشر خراب دیکھ رہا ہوں۔انہوں نے کہا کہ اس بار ملک سے اداروں نے ٹھپہ کلچر کا خاتمہ کروایا ہے، مگر آر اوز نے امیدواروں کے ساتھ ناانصافیاں کی ہیں۔ غیر حتمی غیر سرکاری نتائج میں امیدواروں کے ووٹ کم دکھائے گئے۔منظور وسان نے بتایا کہ وزیراعلی سندھ کا نام ابھی فائنل نہیں ہوا اور قیادت ہی اسے فائنل کرے گی۔
