تارو کونامی گھاٹی تائیوان میں واقع ہے ‘ اسے تاروکھائی بھی کہا جا سکتا ہے اوراسے سنگ مر مر کی گھاٹی کے نام سے بھی جانا جاتا ہے۔ اس منفرد نام کی وجہ یہاں سنگ مر مر کی کثرت سے فراہمی ہے‘ یہاں چہار سو سنگ مر مر پایا جاتا ہے اور اس سنگ مر مر کی وجہ سے اس علاقے میں سفر میں انتہائی دشوار ہے۔ یہ ایک انتہائی خوبصورت‘ دلفریب اور متاثر کن وادی ہے جہاں قدم قدم پر لاتعداد قدرتی نظارے بکھرے ہیں‘ جنہیں دیکھ کر دل کو تسکین اور روح کو طراوت محسوس ہوتی ہے۔ یہ وادی قریباً 19 کلومیٹر طویل ہے اور تائیوان کے مشرقی ساحلی علاقے ہوالین کے شمال میں واقع ہے اور ہوالین کا یہ علاقہ بحر اوقیانوس سے کچھ زیادہ دور نہیں ۔یہ انتہائی دلچسپ امر ہے کہ کئی لاکھ سال پہلے تک یہ علاقہ چونے کے پتھر سے اٹا پڑا تھا مگر پھر بہت زیادہ دباؤ کے باعث یہ علاقہ سطح سمندر سے کہیں بلند ہو گیا اور گرمی اور دباؤ نے یہاں موجود چونے کے پتھر کی چٹانوں کو سنگ مر مر میں تبدیل کر دیا جس کے بعد اس علاقے میں سنگ مر مر جابجا بکھرا ہے۔