اٹلی(مانیٹرنگ ڈیسک) اپنی ہڈیوں کو ہمیشہ مضبوط رکھنا چاہتے ہیں تو پھلوں، سبزیوں، گریوں، زیتون کے تیل اور مچھلی وغیرہ کو زیادہ کھانا شروع کردیں۔ یہ بات اٹلی میں ہونے والی ایک طبی تحقیق میں سامنے آئی۔ بولوگنا یونیورسٹی کی تحقیق میں بتایا گیا کہ پھلوں، سبزیوں، گریوں، زیتون کے تیل اور مچھلی پر مشتمل غذا کو عادت بنالینا عمر بڑھنے سے ہڈیوں میں آنے والی کمزوری سے تحفظ دے سکتا ہے۔
ہڈیوں کی کمزوری کی 6 خاموش علامات تحقیق میں مزید بتایا گیا کہ یہ غذا امراض قلب، الزائمر اور کینسر جیسے امراض سے بچانے میں بھی مدد دیتی ہے۔ محققین کا کہنا تھا کہ یہ پہلی طویل المعیاد تحقیق ہے جس میں بڑھتی عمر میں ہڈیوں کی صحت پر غذا کے اثرات کا جائزہ لیا گیا۔ اس تحقیق کے دوران ایک ہزار سے زائد رضاکاروں کی غذائی عادات کا جائزہ ایک سال سے زیادہ تک لیا گیا۔ محققین نے دریافت کیا کہ ایسے افراد جن کی ہڈیوں کی صحت ٹھیک تھی، ان میں تو اس غذا کے نمایاں اثرات دیکھنے میں نہیں آئے، مگر ہڈیوں کے بھربھرے پن کے شکار افراد کے لیے یہ غذا بہت زیادہ فائدہ مند ثابت ہوئی۔ وٹامن ڈی کی کمی ظاہر کرنے والی 5 علامات انہوں نے بتایا کہ عام طور پر عمر بڑھنے سے کولہوں کے جوڑ کی ہڈیاں کمزور ہوتی ہیں اور ان کے فریکچر کا خطرہ بڑھتا ہے، تاہم یہ غذا اس حصے کو مضبوط بناتی ہے۔ اب محققین اس حوالے سے زیادہ لمبی تحقیق کرنے پر غور کررہے ہیں تاکہ جانا جاسکے کہ یہ غذا کس حد تک ہڈیوں کو مضبوط بنانے میں مدد دے سکتی ہے۔ اس تحقیق کے نتائج طبی جریدے امریکن جرنل آف کلینیکل نیوٹریشن میں شائع ہوئے۔
