بدین(نیوزڈیسک)سابق اسپیکر قومی اسمبلی اور ایم این اے فہمیدہ مرزا نے کہا ہے کہ ذوالفقار مرزا کیخلاف ایف آئی آرز بچے دے رہی ہیں ، جو ابتک 2 سے 4 ہوچکی ہیں،وزیراعلی اپنے مشیروں کو سمجھائیں یہ بھی بتایا جائے کہ سب کچھ کس کے اشارے پر ہو رہا ہے جس نہج پر ذوالفقار مرزا ہیں انہیں اس پر نہ پہنچایا جائے۔چیف جسٹس ہائیکورٹ سے اپیل کی کہ بار بار توہین عدالت کی جارہی ہے،جس چیز کا مجھے خوف تھا آج اس کا ثبوت مل گیا۔بدین میں میڈیا سے گفتگو میں انہوں نے کہا کہ مجھے اس نہج تک مت لائیں جہاں تک ڈاکٹر صاحب کو پہنچایا گیا ہے، وارننگ دی تھی کہ میرے ورکروں پر ظلم ڈھانا بند کریں،میں عدالتوں میں جانے کی ہمت رکھتی ہوں ،تمام ایف آئی آرز جھوٹی ہیں، ہر ایف آئی آر میں نامعلوم لکھاہے تاکہ بعدمیں مرضی سے نام ڈالے جاسکیں۔ انہوں نے سندھ حکومت سے کہا کہ مجھے بتایاجائے کس طرح ایف آئی آر پرایف آئی آر بچے دے رہی ہیں۔فہمیدہ مرزانے کہاکہ پیپلز پارٹی میرا خاندان میرا گھر ہے، میں اسے نقصان نہیں پہنچا سکتی تاہم پارٹی قیادت ہراساں کرنے کا نوٹس لے۔چاہتی ہوں وزیر اعلی ہوش کریں،اپنے مشیروں کو سمجھائیں کہ غلطی پہ غلطی نہ کریں،عوام زور زبردستی سے چپ نہیں ہوگی ، میڈیا ہمارے ساتھ ہے تو ہمیں تحفظ کا احساس ہے۔انہوں نے مزید کہا کہ حفاظتی ضمانت کے باوجود ہر پوسٹ پر پولیس موبائل موجود تھی،کھلم کھلا عدالتی احکامات کی توہین ہورہی ہے،ذوالفقار مرزا پر اب تک7 مقدمات درج ہوچکے ہیں،مجھے نہیں پتا ابتک کتنی زیادہ ایف آئی آرز ہوچکی ہونگی۔