اسلام آباد (مانیٹرنگ ڈیسک) پاکستان تحریک انصاف کے رہنما محمد خان مدنی جنہوں نے 2013ء کے انتخابات میں حمزہ شہباز کے خلاف الیکشن لڑا تھا اور ان الیکشن میں انہوں نے 40 ہزار 801 ووٹ حاصل کیے تھے، محمد خان مدنی نے قومی اسمبلی کے حلقہ این اے 124 کے لیے کاغذات نامزدگی جمع کروائے ہیں اور ان پر انہوں نے ہر جگہ الحمد اللہ، کچھ نہیں ہے، لکھا ہے۔ ایک نجی ٹی وی چینل کی رپورٹ کے مطابق تحریک انصاف کے رہنما محمد خان مدنی
نے اپنے اثاثہ جات صفر بتاتے ہوئے کہا کہ ان کے پاس ذاتی استعمال میں صرف ایک بستر، دو صوفے، ایک فریج اور ایک ٹی وی ہے۔ یاد رہے کہ حلقہ این اے 124 سے حمزہ شہباز کے مدمقابل محمد خان مدنی نے کاغذات نامزدگی جمع کروا رکھے ہیں۔ تحریک انصاف کے رہنما محمد خان مدنی کے خلاف کوئی کریمنل ریکارڈ نہیں اور وہ تحریک انصاف کے بانی کارکن ہیں۔ اہم بات یہ ہے کہ تحریک انصاف نے محمدخان مدنی کو تاحال پارٹی ٹکٹ جاری نہیں کیا ہے۔
