اسلام آباد ( آئی این پی ) پاکستان تحریک انصاف کے سربراہ عمران خان (آج) سرگودھا کا دورہ کریں گے ، پیپلز پارٹی کے رہنما اور قائمہ کمیٹی کے سابق چیئرمین ندیم افضل چن اور پی پی کے اہم رہنما مہر خالق داد پریہار پی ٹی آئی میں باقاعدہ شمولیت کا اعلان کریں گے ۔ تفصیلات کے مطابق پاکستان تحریک انصاف کے چیئرمین عمران خان ( آج) بدھ کو سرگودھا پہنچ رہے ہیں جہاں وہ ایک بڑے عوامی اجتماع سے خطاب کریں گے ۔
اس موقع پر پیپلز پارٹی کے اہم رہنما ندیم چن اور پی پی کے ایم پی اے کے امیدوار مہر خالق داد پریہار پاکستان تحریک انصاف میں شمولیت کا اعلان کریں گے ۔ واضح رہے کہ چند روز قبل ندیم افضل چن نے عمران خان سے ملاقات کی تھی اور ان کی قیادت پر مکمل اعتماد کا اظہار کرتے ہوئے پی ٹی آئی میں شمولیت کا اعلان کیا تھا تاہم یہ کہا گیا تھا کہ وہ باضابطہ اعلان سرگودھا میں عمران خان کے دورہ کے موقع پر کریں گے ۔ ذرائع کا کہنا ہے کہ عمران خان جس بڑی وکت گرنے کی بات کر رہے تھے وہ یہی ہے ۔
