لاہور( آن لائن )کامن ویلتھ گیمز 2018ء4 میں ریسلنگ کے مقابلوں میں پاکستان کیلئے گیمز کا واحد گولڈ میڈل جیتنے والے انعام بٹ کا کہنا ہے کہ بھارتی پہلوان سے مقابلے کے دوران تماشائی انڈیا، انڈیا کے نعرے لگا رہے تھے، انہوں نے اس چیلنج پر قابو پانے کیلئے خود کو یہ باور کروایا یہ تماشائی دراصل انعام، انعام کے نعرے لگا رہے ہیں ،وہ اس طر ح اس چیلنج پر قابو پانے میں کامیاب ہوئے اور ڈیڑھ منٹ میں 10۔0کے بڑے

مارجن سے بھارتی ریسلر کو ہرا کر اگلے راؤنڈ کیلئے کوالیفائی کرلیا۔انعام بٹ کامزید کہنا تھا کہ کامن ویلتھ گیمز میں جس بھارتی پہلوان کے ساتھ ان کا مقابلہ تھا، وہ ہاٹ فیورٹ اور گولڈ میڈلسٹ تھا، اس مقابلے کیلئے انہوں نے اپنے کوچز سہیل رشید، فرید اور محمد انور کے ساتھ مل کر بہت تیاری کی اور اپنے بنائے پلان میں کامیاب ہوئے اور بھارتی پہلوان کو بڑے مارجن سے شکست دے کر اگلے راؤنڈ کے لیے کوالیفائی کیا۔