لاہور (مانیٹرنگ ڈیسک) فیس بک کی فوٹو شیئرنگ ایپلی کیشن انسٹاگرام میں کسی پوسٹ کو شیئر کرنے کی الجھن سے نکلنے کے لیے جلد ہی صارفین کے لیے ’ریگرام‘ فیچر متعارف ہوجائے گا۔ ٹیک کرنچ کی رپورٹ کے مطابق فیس بک کمپنی کی جانب سے یقین دہانی کروائی گئی ہے کہ جلد ہی انسٹاگرام پر پبلک پوسٹ شیئر کرنے کے لیے ’ریگرام‘ فیچر متعارف ہوجائے گا۔فی الحال یہ فیچر آزمائشی مراحل میں ہے۔
لیکن جلد ہی اسے انسٹاگرام کے تمام صارفین استعمال کرسکیں گے۔’ریگرام‘ فیچر کی مدد سے صارف کو سہولت ہوگی کہ وہ کسی بھی پبلک پوسٹ کو اپنی اسٹوری میں آسانی سے شیئر کر سکے گا اور اسے اسکرین شاٹ کی مشکل سے بھی گزرنا نہیں پڑے گا۔ اس حوالے سے انسٹاگرام کمپنی کے ترجمان کا کہنا تھا، ’ہماری ہمیشہ سے کوشش ہوتی ہے کہ صارف اپنے قیمتی لمحات آسانی سے دوستوں سے شیئر کرسکیں، یہی وجہ ہے کہ منفرد فیچرز کی آزمائش کرکے انہیں ایپ میں شامل کیا جاتا ہے‘۔واضح رہے کہ فی الوقت اسٹوریز میں صرف وہی ویڈیوز اور تصاویر شیئر ہوسکتی تھیں جو صارف کے فون میں موجود ہوتی ہیں لیکن اس نئے فیچر سے دیگر پبلک پوسٹس بھی اسٹوری میں شیئر ہوسکیں گی۔اس کے علاوہ ‘ریگرام’ فیچر کے اندر اسٹوری کی اصل پوسٹ پر جانے کے لیے ’سی پوسٹ ‘ (see post)کا آپشن بھی موجود ہوگا۔تاہم اگر کسی صارف کے پاس یہ آپشن فعال نہ ہو تو اس کے لیے ضروری ہے کہ وہ سیٹنگز میں جاکر آپشنز میں جا کر (allow resharing to stories) پر کلک کرے، جس سے وہ ’ریگرام‘ فیچر کی سہولت حاصل کرسکتا ہے۔
