اسلام آباد(نیوز ڈیسک) ڑیانگ ڑو کے علاقے میں چوری کی انوکھی واردات میں 2چوروں نے 460میٹر لمبی سڑک اکھاڑ کر اس پر لگائی گئی کنکریٹ کی سلیں بیچ ڈالیں۔ نن ٹنگ شہر کے مضافاتی علاقے میں یہ سڑک 2008ئ میں تعمیر کی گئی اور تاحال بہترین حالت میں تھی۔ چند روز قبل سڑک کی اوپر لگی کنکریٹ کی سلیں غائب ہونے کے واقعے نے دیہاتیوں کو حیران کر دیا۔ پولیس بھی اس بات پر حیران تھی کہ راتوں رات اتنی طویل سڑک کی سلیں کیسے غائب ہو سکتی ہیں۔یہ کارنامہ گو اور ینگ نامی دو آدمیوں نے 2دن میں کر دکھایا تھا۔ وہ مشینری کے ذریعے 630ٹن وزنی سلیں اکھاڑ کر لے گئے اور کسی کو کانوں کان خبر بھی نہ ہوئی۔سلیں انہوں نے 12ہزار ین میں فروخت کیں اور رقم آپس میں تقسیم کرنے ہی والے تھے کہ پولیس نے دھر لیا۔ پولیس نے سڑک کنارے لگے ہوئے کیمروں میں محفوظ ہوجانے والی ویڈیو سے ان کا سراغ لگایا۔ ملزم گو نے بعد میں منصوبے کا ماسٹر مائنڈ ہونے کا اعتراف کرتے ہوئے کہا کہ سڑک زیادہ استعمال نہیں کی جاتی تھی اس لیے اس کے ذہن میں اسے اکھاڑ کر فروخت کرکے رقم کمانے کا خیال آیا۔