اسلام آباد(نیوز ڈیسک) ایک جوڑے نے اپنی شادی کو یادگار بنانے کے لیے انوکھا طریقہ ڈھونڈ نکالا۔ 37سالہ کرس بل اور 25سالہ فوبے بیکر اپنے مہمانوں سے 80فٹ اوپرلٹکتی تاروں پر شادی کریں گے۔ کرس اور مس بیکر ایک سال سے اپنی شادی کا پروگرام ترتیب دے رہے ہیں، ضروری سامان اکٹھا کر رہے ہیں اور تاروں پر چلنے کی ریہرسل کر رہے ہیں۔جوڑے کا رجسٹرار ایک رنگ ماسٹر ہو گا جو 80فٹ نیچے مدعو کیے گئے 100مہمانوں میں کھڑامیگا فون کے ذریعے جوڑے سے رابطہ کرے گا۔ برسٹل کا رہائشی جوڑا تاروں پر کھڑے ہو کر ہی ایک دوسرے کو انگوٹھی پہنائے گا۔اس حوالے سے گفتگو کرتے ہوئے مس بیکر نے کہاکہ ان کی شادی تاریخی ہو گی۔ جب سے میں اورکرس ایک دوسرے سے ملے ہیں اس طریقے سے شادی کرنے کا خواب دیکھتے آئے ہیں۔ کرس نے ہی مجھے اتنی بلندی پر لٹکتی رسی پر چلنا سکھایا ہے۔مسٹر بل نے، جنہیں رسی پر چلنے کا 15سالہ تجربہ ہے، کہا کہ انہوں نے 4سال قبل اپنی منگیتر کو بھی رسی پر چلنا سکھانا شروع کر دیا تھا۔بیکر نے بہت نیچے بندھی ہوئی رسی پر چلنا شروع کیا جسے بتدریج اونچا کرتے گئے۔ مسٹر بل نے کہا کہ انہوں نے ہمیشہ یہ خواب دیکھا لیکن وہ نہیں سوچتے تھے کہ کبھی کوئی خاتون اس طرح شادی پر رضامند ہو جائے گی۔