اسلام آباد (مانیٹرنگ ڈیسک)پاکستان تحریک انصاف کی لودھراں این اے 154میں عبرتناک شکست پر ملک بھر میں چہ مگوئیاں جاری ہیں ۔ معروف اینکر پرسن منصور علی خان نے پی ٹی آئی کی لودھراں این اے 154میں عبرتناک شکست پر کہا کہ تحریک انصاف کو اپنی شکست سے سبق سیکھنا چاہیے کیونکہ جب یہ اپنے نعروں سے دور ہٹیں گے تو عوام انہیں مسترد کر دے گی ۔ تفصیلات کے مطابق منصور علی خان نے سوشل میڈیا کی ویب سائٹ ٹویٹر پر پاکستان تحریک انصاف کی شکست پر ایک ٹویٹ جاری کیا ہے

جس میں انہوں نے پی ٹی آئی کو کہا ہے کہ وہ اپنی ہار سے سبق سیکھیں ، ان کا کہنا تھا کہ علی ترین شروع سے ہی بطور امیدوار ان کا غلط انتخاب تھا ۔ منصور علی خان نے مزید کہا کہ علی ترین کو عمران خان اور شیخ رشید سمیت پی ٹی آئی کے تمام اہم رہنماؤں کی حمایت حاصل تھی اور انہوں نے علی ترین کی انتخابی مہم میں بھی حصہ لیا۔ دوسری جانب مسلم لیگ ن کے امیدوار کی حمایت میں شریف خاندان کا کوئی ایک شخص بھی لودھراں نہیں گیا اور نہ ہی اس کی مہم چلائی لیکن اس کے باوجود اس کی پرفارمنس انتہائی شاندار رہی جو پاکستان تحریک انصاف کیلئے کھلے لفظوں میں واضح پیغام ہے ۔منصور علی خان کا مزید کہنا تھا کہ اگرپاکستان تحریک انصاف اپنی وہ محفوظ سیٹ جس پر اس کا جنرل سیکرٹری جہانگیر ترین باآسانی 40 ہزار ووٹوں کی برتری سے جیت گئے تھے آ ج بری طرح ہار گئی ہے ، پنجاب میں باقی نشستوں کا کیا ہو گا جو کم محفوظ ہیں ۔ کیا تحریک انصاف کے غبارے واقعی ہوا نکل گئی ہے ۔