مظفرآباد (این این آئی) میاں نواز شریف کے استقبال کیلئے آنے والے جلوسوں میں گاڑیوں اور موٹر سائیکلوں کے آپس میں تصادم سے پندرہ سے زائدکارکن زخمی ہو گئے جو ایم ایل اے کھاوڑہ راجہ عبدالقیوم خان کے جلوس میں سب سے آگے نکلنے کی کوشش میں مختلف مقامات پر گاڑیوں کے رش کے باعث ٹکرا کر گرے دو موٹر سائیکلز کو شدید نقصان بھی پہنچا اور ان پر سوار نوجوانوں کو گاڑیوں میں بٹھا کر ہسپتال لے کر جایا گیا جہاں سے ابتدائی طبی امداد کے بعد پر نوجوان جھومتے
اور نعرے بازی کرتے جلسہ گاہ پہنچے ۔ میاں محمد نواز شریف ، مریم نواز کا آزاد کشمیر کوہالہ داخل ہونے پر ہزاروں کارکنان نے دیوانہ وار آئی لو یو نواز شریف کے نعروں کے ساتھ استقبال کیا اور نواز شریف سمیت مریم نواز کی گاڑیوں سے لپک کر انکے حق میں نعرے بازی کے دیدنی مناظر دیکھے گئے ۔ ایم ایل اے راجہ عبدالقیوم خان اور دیگر کو جیسے ہی پتہ چلا نواز شریف بائی روڈ آرہے ہیں تو حلقہ کھاوڑہ کے سب جلوسوں کا رخ مظفرآباد سے واپس کوہالہ کی طرف کر دیا گیا ۔ مظہر قیوم ایڈووکیٹ کی قیادت میں ہزاروں کارکنان کوہالہ پل پر پہنچ گئے جہاں نواز شریف کے آتے ہی آئی لو یو نواز شریف آئی لو نواز شریف کی صداؤں کے ساتھ انکا استقبال کیا گیا اور کوہالہ سے بڑے قافلے نے سب جلوسوں کے ساتھ ملنے پر کارواں کی شکل اختیار کر لی جسکے باعث جلسہ گاہ پہنچنے میں مقررہ وقت کے بجائے بہت زیادہ تاخیر ہو گئی ۔ کارکن سینکڑوں کی تعداد میں نواز شریف کے قافلے کی گاڑیوں کے ساتھ پیدل چلتے رہے ،پرویز مجید، چوہدری شفقت و دیگر نے قافلے کو رواں دواں رکھنے کے لئے مسلسل لائنیں سیدھی کراتے رہے ۔
