سرینگر(آن لائن)مقبوضہ کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران ضلع شوپیان میں تین نوجوانوں کو شہید اور دو لڑکیوں سمیت متعدد افرادکو شدید زخمی کردیا۔میڈیا رپورٹ کے مطابق نوجوان کو ضلع کے علاقے چائی گنڈ میں تلاشی اورمحاصرے کی کارروائی کے دوران شہید کیا گیا ۔ شہید لڑکے کی شناخت شاکر احمد میر کے طور پر ہوئی ہے اور وہ قلم پورہ شوپیان کا رہائشی ہے۔
بھارتی فوج کا کہنا ہے کہ علاقے میں مجاہدین اور فوج کے درمیان ایک جھڑپ میں دو اور نوجوان شہیدہو گئے ہیں۔زخمی لڑکیوں کی شناخت سمیع جان اور سبرینہ کے طور پر ہوئی ہے۔فوج کی کارروائی کے دوران بڑی تعداد میں نوجوانوں نے جمع ہو کر بھارتی فورسز پر پتھراؤ کیا ۔اہلکاروں نے مظاہرین کو منتشر کرنے کیلئے آنسو گیس اور پیلٹ گنوں کا بے دریغ استعمال کیااور براہ راست فائرنگ کی جس سے ایک نوجوان شاکر احمد میر شدید زخمی ہو گیا جسے فوری طورپر ہسپتال منتقل کیاگیا تاہم وہ راستے ہی میں دم توڑ گیا ۔ بھارتی فورسز کی فائرنگ سے دو لڑکیاں بھی شدید زخمی ہوئیں جنہیں سرینگر کے صورہ ہسپتال منتقل کردیاگیا۔ شاکر کے جاں بحق ہونے کی خبر جیسے ہی شوپیان کے گاؤں چھے گنڈپہنچی صورتحال کشیدہ ہوگئی اور مشتعل مظاہرین نے سڑکوں پر نکل کر بھارتی فورسز کے خلاف شدید احتجاج کیا ۔ اس موقع پر بھارتی فورسزاورمظاہرین کے درمیان جھڑپیں بھی ہوئیں۔
