جدہ(سی پی پی )وفاقی وزیر داخلہ احسن اقبال نے کہا ہے کہ حکومت کہیں جانیوالی نہیں ،(ن)لیگ کو عوام نے پانچ سال کیلئے منتخب کیا ، ہم اپنی آئینی مدت پوری کریں گے ،مدت پوری ہونے کے60روز کے اندر انتخابات ہو جائینگے۔ان خیالات کا اظہار انہوں نے عمرہ کی ادائیگی کے بعد جدہ میں میڈیا سے گفتگو کرتے ہوئے کیا ۔عمران خان پرتنقید کرتے ہوئے وزیر داخلہ نے کہا کہ عمران خان ناتجربہ کار سیاست دان ہیں

اور قبل از وقت انتخابات کا مطالبہ بچگانہ ہے ۔انہوںنے کہاکہ عمران خان کی پارٹی نے خیبر پختو نخوا میں ایک میگاواٹ بجلی بھی پیدا نہیں کی جبکہ مسلم لیگ (ن) کی حکومت نے گزشتہ چارسالوں میں بجلی کی لوڈشیڈنگ پر صرف قابو ہی نہیں پایا بلکہ ملکی ضرورت سے بھی زائد بجلی پیدا کردی ہے ۔ حکومت کی مدت پوری ہونے پر

60روز کے اندر انتخابات ہوجائیں گے، حکومت 4جون کو اپنی مدت پوری کرے گی اور انتخابات وقت پر ہوں گے، قوم کو ترقی کے تسلسل کو قائم رکھنا چاہیے۔ان کا کہنا تھا کہ ملک میں بجلی کے سنگین بحران پر قابو پانے میں سی پیک نے اہم کردار ادا کیاکیونکہ ہم نے 2013کے انتخابات میں بجلی بحران اور دہشت گردی پر قابو پانے کا وعدہ کیا تھا۔