لاہور (مانیٹرنگ ڈیسک) قومی احتساب بیورو ( نیب ) نے چوہدری بردران کو کل ( جمعہ ) 15 دسمبر کو دوبارہ طلب کرلیا جبکہ ہاؤسنگ سوسائٹیز میں کروڑوں کے گھپلوں کی تحقیقات کا دائرہ کار بھی وسیع کردیا گیا ، سابق ڈی جی ایل ڈی اے احد چیمہ اور پیراگون سوسائٹی کے چیف ایگزیکٹیو آفیسر ندیم ضیا پیرزادہ کو آج ( جمعرات ) طلب کر لیا گیا ۔
میڈیا رپورٹس کے مطابق نیب لاہور نے مختلف مقدمات میں سابق وزیر اعظم چوہدری شجاعت اور سابق وزیر اعلی پنجاب چوہدری پرویز الٰہی کو آمدن سے زائد اثاثے بنانے پر ایک بار پھر 15 دسمبر کو طلب کر لیا ہے۔نیب ذرائع کے مطابق چوہدری شجاعت اور پرویز الٰہی کے خلاف آمدن سے زائد اثاثوں کے مقدمات کھولے گئے ہیں۔ مشرف دور میں دونوں رہنماؤں کے اہم سیاسی عہدوں اور دباؤ کے باعث مقدمات کو بند کر دیا گیا تھا تاہم ڈی جی نیب لاہور کی ہدایت پر ان مقدمات کو دوبارہ کھولا گیا۔چوہدری برادران نے 6 نومبر کو نیب کے روبرو پیش ہوکر ناجائز اثاثوں کے ریفرنس کا الزام مسترد کردیا تھا۔ذرائع کے مطابق نیب نے چوہدری شجاعت اور پرویز الٰہی کو 6 نومبر کو اثاثہ جات کی معلومات فراہم کرنے کا حکم دیا تھا۔دوسری جانب نیب نے ہاؤسنگ سوسائٹیز میں کروڑوں کے گھپلوں کی تحقیقات کا دائرہ کار وسیع کردیا ہے۔ سابق ڈی جی ایل ڈی اے احد چیمہ اور پیراگون سوسائٹی کے چیف ایگزیکٹیو آفیسر ندیم ضیا پیرزادہ کو آج ( جمعرات ) طلب کر لیا گیا ۔ جبکہ پنجاب لینڈ ڈویلپمنٹ کارپوریشن سے تمام معاہدوں کی تفصیلات بھی طلب کرلی گئی ہیں۔نیب نے پی ایل ڈی سی کیس میں علی سجاد کو جمعرات کو طلب کیاہے اور فریقین کو ضروری دستاویزات کے ہمراہ نیب لاہور میں پیش ہونے کا حکم دیا گیا ہے۔
