اسلام آباد (مانیٹرنگ ڈیسک) وزیرمملکت برائے داخلہ طلال چودھری نے کہا ہے کہ زرداری ، قادری ملاقات دیکھ کر بھٹو کی روح کانپ اٹھی ہوگی، جڑانوالہ نوازشریف کا شہر ہے اور رہیگا،ہم نے عمران خان کو جڑانوالہ میں جلسہ کرنے کی اجازت اور سیکیورٹی دی، اگروہ کہتے تو ہم بندے بھی بھیج دیتے۔
عمران قادری زرداری اتحاد زیرو جمع زیرو ہے، وہ ہمارا کچھ بھی نہیں بگاڑ سکتے۔جمعہ کو جڑانوالہ میں عمران خان کے جلسے پر تبصرہ کرتے ہوئے وزیر مملکت طلال چودھری نے کہا کہ عمران خان کے پچھلے دھرنے کو چودھری برادران نے سپانسر کیا اور اب زرداری کرینگے۔ انہوں نے کہا کہ زرداری ،قادری ملاقات دیکھ کر بھٹو کی روح کانپ اٹھی ہو گی ، انہوں نے کہا کہ اس ملاقات نے بھٹو اور پیپلز پارٹی کے نظریئے کو دفن کردیا ہے۔ انہوں نے کہا کہ عمران قادری زرداری اتحاد زیرو جمع زیرو ہے، وہ ہمارا کچھ بھی نہیں بگاڑ سکتے۔ انہوں نے کہا کہ عمران نے ساڑھے چار سال الزامات کی سیاست کی ہے ان کا موبائل، زبان اور تقریر تینوں ایک جیسی گندی ہیں۔ انہوں نے کہا کہ عمران نے عوام کو دھرنا ،گالی اور لاٹھی کے سوا کچھ نہیں دیا۔ انہوں نے کہا کہ 2018 ء کے انتخابات میں مسلم لیگ دوتہائی اکثریت سے جیتے گی اور عوام لوڈشیڈنگ ختم کرنیوالوں کو ووٹ دیں گے۔ انہوں نے کہا کہ ہم نے جڑانوالہ کو موٹر وے، ہسپتال، یونیورسٹی اور کئی سہولیات دی ہیں۔ انہوں نے کہا کہ جڑانوالہ نوازشریف کا شہر ہے اور رہیگا،ہم نے عمران خان کو جڑانوالہ میں جلسہ کرنے کی اجازت اور سیکیورٹی دی، اگروہ کہتے تو ہم بندے بھی جلسے میں بھیج دیتے۔
