نئی دہلی/لندن /واشنگٹن (آئی این پی)پاکستان کے علاوہ بین الاقومی میڈیا نے بھی نوازشریف کی جی روڈ سے لاہور ریلی کی بھرپور اور نمایاں کوریج کی ۔تفصیلات کے مطابق بدھ کو سابق وزیراعظم نوازشریف کی قیادت میں ریلی پنجاب ہائوس اسلام آباد سے لاہور کیلئے روانہ ہوئی جس کی پاکستانی میڈیا کے علاوہ بین الاقومی میڈیا نے بھی بھرپور کوریج کی ۔بھار تی ٹی وی چینلز بھی نوازشریف کی ریلی کے مناظر دکھاتے رہے جبکہ

معروف بھارتی اخبارات دی ہندو،ہندوستان ٹائمز،انڈین ایکسپریس سمیت دیگر اخبارت اور ویب سائٹس نے سابق وزیراعظم نوازشریف کی نااہلی کے بعد جی ٹی روڈ سے لاہور ریلی پر مختلف تبصرے کیے۔دی ہندو نے لکھا نے نوازشریف نے نااہلی کے بعد طاقت کا مظاہرہ کرنے کیلئے لاہور تک روڈ شو کا آغاز کردیا ہے ۔بی بی سی سمیت برطانوی اور امریکی میڈیا نے بھی نوازشریف کی ریلی پر تبصرے شائع کیے۔واضح رہے کہ ایکسپریس چوک سے روانگی کے بعد نوازشریف کو مجاہد پلازہ بلیو ایریا، فیصل چوک، زیرو پوائنٹ، آئی ایٹ اور فیض آباد استقبالیہ دیا گیاجس کے بعد ریلی مری روڈ پرفیض آباد سے شمس آباد، سکستھ روڈ، رحمان آباد، چاندنی چوک، ناز سینما، کمیٹی چوک اور لیاقت باغ سے گزرے گی، ان تمام مقامات پر ریلی کواستقبالیہ دیا جائے گا۔ سیکیورٹی خدشات کے پیش نظر مری روڈ سے ملحقہ تمام سڑکیں، پیٹرول پمپ اور دکانیں بھی مکمل طور پر بند کرادی گئی ہیں ۔ نواز شریف کے فیض آباد، شمس آباد اور کچہری میں بھی خطابات متوقع ہیں۔ مریڑچوک، کچہری چوک سے ریلی ٹی چوک جائے گی اور وہاں سے روات سٹی پہنچے گی جہاں پر بھی نواز شریف کا کارکنوں سے خطاب متوقع ہے، اس کے بعد ریلی جی ٹی روڈ سے مندرہ، گجر خان، سہاوا اور دینہ سے گزرتی ہوئی جہلم پہنچے گی، جہاں نواز شریف کارکنوں سے خطاب کریں گے اورپھر سرائے عالمگیر میں رات قیام کریں گے۔ریلی کے روٹ پر اسلام آباد پولیس، اسپیشل برانچ اور حساس اداروں کے 2500سے زائد اہلکار تعینات ہیں۔